07.29.06

هوا المحاياة

نشرت تحت تصنيف حياتي في 1:54 ص بواسطة tagreba

أجازة مهمة جداً الحقيقة، رغم إني باعز مرسى مطروح في العادي، إلا إن أي أجازة في أي مكان دلوقتي على ترعة حتى كانت هتبقى استخراع عبقري قوي خالص. وصلت هنا من يومين مع الأسرة الكريمة، بس مش عارف طالبة معايا نوم وتتنيح بشكل مريب، مع إن الجو تحفة، ومع إني مبضربش أي حاجة حالياً ولا قبل كدة، لكن الإرهاق فعلاً يعمل أكتر من كدة، شهور شغل طويلة بدون توقف ومشروع خطوبة لم يكتمل على آخر وقت. كان شيء مزعج الحقيقة إن كل الناس عمالة تتصل تبارك لي، او تشوفني بشكل عابر واضطر افضل اقول نفس الاسطوانة بنفس الوش الراضي المرْضي: يا جماعة محصلش نصيب، يا جماعة انا كويس، والنعمة الحياة حلوة، والله فيه أمل.. بس الناس دايما كانت شاكة في كلامي.. مش عارف ليه، أو يمكن عارف، ما علينا.

لكن النهاردة ايه بقى، كنت عند سيدنا البحر، وضربت اجدع بلانصات في الهوا - فشْر طبعا - وخرجت بإصابة خفيفة كدة في رجلي، ومتعت عيني وروحي بشوية براح وانطلاق طفولي واحشيني. افتكر النص المليان من الكوباية إن الواحد رغم خيبة الأمل العادي والحزن الطبيعي على أي حاجة جميلة بنفقدها واللخبطة اللي بتعقب أي حدث من هذا النوع، إلا إنها بتكون فرصة عظيمة خالص لإعادة ترتيب كل الأوراق، والتقليب في أي مشاريع قديمة منسية، التصالح والتسامح مع خلق ربنا بما فيهم نفسك، وبوس إيد الشعر والحَب على راس المزيكا، ومدد..

الشيء المتعب والمدهش والجميل اننا مش هنبطل نتعلم عن نفسنا وعن الدنيا وعن الناس، كانت هتبقى ايه الدنيا دي من غير حتمية الاكتشاف والتجربة، مفيش أجمل من ناس حواليك قد كدة انت هاممهم، في فرحك مبسوطين أكتر منك، وفي زعلك مفيش زي كدة ونس. ويا مرسى مطروح، اجمل ما فيكي هوا المحاياة، بيرد روح ويود روح ويمد بوح، ودلوقتي جه وقت تأجير العجل ومعاكسة البنات (طالبة معايا فشر)، انتظروا الصور قريباً بالسمن البلدي

10 تعليق »

  1. Moia قال,

    يوليو 29, 2006 في 2:27 ص

    :))))
    والله انت جميل اوى يا عمر
    انا كمان بصيف على فكره بس فى مكان اجمل من مطروح بكتيييييير :S
    سيبك انت نهارك ابيض وقلبك زى الفل وان شاء الله يفضل زى الفل ..قول يا رب :)

  2. Lasto-adri *Blue* قال,

    يوليو 29, 2006 في 3:00 ص

    احب اتنين سوا.. الميا والهوا….
    مطروح دى حب حياتى.. وغرامى الأول والأخير
    ياسلاملم على المنظر فى عجيبة.. ولا روميل بقى و كليوبترا و شاطئ الغرام.. ياعينى
    ماتنساش تأجر بدال فى الماية لوحدك
    عيشة.. عيشة

    ادعيلى بقى… مش قادرة استنى الكام اسبوع دول لحد ما اروح هناك حيث الهدوء وراحة البال

    بى اس: انا لاحظت ان البوست اتشال من فترة.. بس ما حاولتش افهم.. بس قدر الله وارجع من مطروح ببلطية :D

  3. سامية قال,

    يوليو 29, 2006 في 6:42 ص

    “كانت هتبقى ايه الدنيا دي من غير حتمية الاكتشاف والتجربة”

    عندك ألف حق يا عمر…

    أنا بس عايزة أقول لك والله وربنا يعلم مع إننا ماحناش اصحاب قدام لكن فعلا انت أخ وإنسان جميل ومحترم الواحد بيعتز بمعرفته .. وفي فرحك فرحانين وفي زعلك ما نتمنالك غير زواله

    ربنا يسعدك يا عمر دايما ويقدملك كل اللي فيه الخير

    والسلام أمانة لأجمل بحر في الدنيا

  4. Eman M قال,

    يوليو 29, 2006 في 7:37 ص

    :))

  5. Nour قال,

    يوليو 30, 2006 في 10:37 ص

    عمر واضح أن موضوع النوم في مطروح ده منتشر قوي… أنا بنام هنا بتاع 16 ساعة في اليوم و الباقي بحر :D

  6. Aladdin قال,

    يوليو 30, 2006 في 12:40 م

    Way to go man!

  7. Guevara قال,

    أغسطس 1, 2006 في 3:40 ص

    مفيش أجمل من ناس حواليك قد كدة انت هاممهم

    هي دي كل الحكاية .. ببساطة :)

  8. Shaimaa قال,

    أغسطس 1, 2006 في 9:31 ص

    حمد الله على السلامة يا عمر، وفي
    إنتظار الصور بالسمنة البلدي :)

  9. foaa قال,

    أغسطس 1, 2006 في 11:51 ص

    كله بيعدى
    المهم الوقت الحلو مبيتعوضش
    خليك فخور بنفسك
    وفاء رسلان

  10. Doaa Samir قال,

    أغسطس 3, 2006 في 8:32 ص

    أيوة يا عمر… أيوة كده
    نام وعيش واتنفس البحر
    ملعون الهم وكل عيلته

    فكرتني لما جيت تسافر قلت لك: خد الأجازة بجد

    يارب ترجع راضي ومرضي عشان لما أسألك إنت عامل ايه؟ وتقول لي “كويس”، أصدقك

    (:

أترك تعليقا