08.17.06
آخر سحابة
فاكر آخر سحابة صاحبتها وممطرتش
عشان خاطر عيونك دمعت ومدمعتش
حاولت تطلع.. نزلت.. سألت ليه
وفضلت مستني الشتا علشان إجابة
عارف البنت أم عيون إزاز فتارين
احتجت فترة تفهم فرق بين حاجتين
لون الروايح.. وريحة التلوين
وإنك مستكنش في عيون مبتسعش الرحابة
شايف المترو اللي عدى وملحقتوش
الشارع الفاضي اللي زحمة مملتهوش
صوت خطوتك أعلى من زعيق ميادين
وروحك غنوة.. الصبح.. في بيوت الغلابة
فاكر آخر سحابة؟؟
الصورة لمهاب بوب – تصويري
6/8/2006
