09.14.06
المدينة الصبح بدري
المدينة الصبح بدري
الشوارع لسّة فاتحة
والمدارس لسّة فاتحة
المحلات..
والحواري
والمجارى
بلكوناتها.. بواباتها
والعيون لسّاها فاتحة
في المدينة الصبح بدري
في المدينة الصبح بدري
العجل ساير وداير
والسجاير..
مالية قلب الميكروباص
والكتب فوق رجل فاطمة
والعينين مليانة ناس
والحناجر لسة عتمة
والإيدين..
بتجس نبض الأمنيات
في المدينة الصبح بدري
في المدينة الصبح بدري
تسبق الرجلين طريقها
والشوارع مش ملاحقة
مــش مـوافــقــة..
والطريق مع إنه واضح
هاجس المجهول مقاوح
واللي جاى مع اللي رايح
كـلــه ســايــح..
فى المدينة الصبح بدرى
في المدينة الصبح بدري
العصافير من كرمها
لسه بتزقزق وتسرح
رغم دخان المصانع
والعوادم والتراب
رغم تلاجة مشاعر
طالعة من ورا ألف باب
إنهيار ساقع وهادى
لحكايات عمالة تجرى
واغتيال الصبح عادى
في المدينة الصبح بدري
أنا
زمان زي اليومين دول
عوليس قال,
سبتمبر 14, 2006 في 7:15 م
الله عليك ياعم عمر
Aladdin قال,
سبتمبر 15, 2006 في 7:29 ص
كويس يا عمر أنه رغم دخان السجاير في الميكروباص والعوادم والتراب لسه العصافير قادرة تزقزق!!
أرفع لك القبعة – كعادتي – سيدي!
radwaosama قال,
سبتمبر 15, 2006 في 8:18 ص
حلوه يا عمر قوي
tagreba قال,
سبتمبر 16, 2006 في 12:18 م
samia قال,
سبتمبر 18, 2006 في 9:58 ص
أهه إنت اللي “يا عيني”.. أنا قاعدة بامزمز في البلوج الجديد كده على راحتي عشان لو كان فيه حاجة قبل كده فاتتني كده ولا كده
بس القصيدة دي ما قدرتش اعدي من غير ما أمسي عليها
))
tagreba قال,
سبتمبر 18, 2006 في 11:11 ص
مساء الفل يا ستي
wafaa قال,
أكتوبر 22, 2006 في 7:03 ص
يا نهار احساس
ايه ده
انت اكيد منالى بيتبهدلوا كل يوم الصبح زيى بس لسه بتشوف حاجات جميلة
مش عارفة
طيب متحاول تلحنها
دى تحفة
عاملة زى اغانى منير الى بتكتبها كوثر مصطفى ياعنى شوية كدة فيها روح ساح يا بداح
بجد تجنن احساسك فوق العالى
احييك
وفاء