حسن الحجيري صديق بحريني عرفته في برنامج سفينة شباب العالم في اليابان من سنتين، وهو رجع تاني لليابان ومقيم فيها حالياً للدراسة. حسن عازف عود جميل ودايماً كان بيجمعني بيه اهتمامنا المشترك بالمزيكا خصوصاً إنه كان عندنا الفرصة إنه نعيش ده مع بعض شهرين كاملين في عرض المحيط. هاسمّعكوا تجربة موسيقية مشتركة بين حسن على العود وبين صديق أسباني ليه عايش برضه في اليابان بيعزف على آلة يابانية تقليدية اسمها “شاكوهاتشي” هي من آلات النفخ وصوتها أقرب للناي أو الكولة عندنا.. التجربة عجبتني وحبيت تشاركوني استمتاعي بيها

استمع: عود وشاكوهاتشي

إهداء لإياد ولميس ولكل اللي اختاروا يحبوا بعض في هذا الزحام

إيه كان واخده إيه
للقصايد والأغنيات
غير غيطان خضرة ف عنيه
غير قلب مليان حدّوتات

كان مرة فارس
من غير حصان
كروان ومن غير اجنحة
قابل أميرة روح الحنان
ضحكة عنيها مفرحة
طب كنتي فين
طب كنت فين
طب كنا فين من زمان

شعر ولحن وغنا بالمرة: عمر

ملف الصوت: من بروفة لجميزة (ناصر، نورا، تميم، منير، رضا، رامي، ياسر، نور، عصام) قشطة عليكوا

شعور يوجع انك تقول لحد جمييل قوي، اول مرة تشوفه: صباح الخير، وتبقى عارف ان دي آخر مرة هتشوفه أو تقول له: صباح الخير، حتى لو كان الحد ده ياسمينة فوق سطوح بيتكو……. هههههههههه كل ده ياسمين قلت له صباح الخير ومشفتهوش تاني، صباح الخير يا ياسمينة

فوتوغرافيا: عمر