12.12.06
عـيــــِّـل
عيِّل..
ماشــي و دراعـي
فى كـــف ابويـا
لكن عنيّا في ألف منظر
مصاحبة نور الفترينات
وودانى بين السماعات
حافظة أغاني الاعلانات
وعــــارف امتى..
ابدأ أعيّـــــط
وامتى اتنطط و اهلل
عيِّل..
باحب ده علشان باحبه
و مابكرهــــوش..
حتى لو كان مش جميل
و لسّــــه وشّى..
محتاجش لرتـــوش
و لسّه قــــلبي..
ماحتاجش لــبديل
باحلم بنفسي طويل طويل
واما يجينى نعاس باميِّل
عيِّل..
بابني البــــيوت..
من مخدات الصالـون
والعب مع بنت خالي
عــروسة و عريس
والعب حرامية و بوليس
كائن ماليش ف العكننة
و ماحبش الأمر الغليظ
و قلبي يبدأ لارتعـاش
لما الســما تبدأ تليّل
عيِّل..
عمرى ما حسيت بالملل
حتى فى أوقـات الزعل
حتى ف أوقـات الملل
عمرى ما حسيت بالملل
و كل لحظة تعــدّي
يتخزن شعــــور..
و كل ريحة و كل صوت
ما رحتش من مناخـيري
ريحة البارفانــــات
ولا راحت من عنيّــا
أشكال البيــــوت..
حُـــضنك يا ستـّي
لحن مالهـوش أى صوت
شوقي للأفــــراح
تواتى..
صبري ع الأحــزان..
تفوت
أنا عايز اشــــوط..
كورة
واجيب مليــون هدف
عُـــــمري اتحدف
لكن ف لحظات بابـقى..
عيِّل..
من ديوان : أسباب وجيهة للفرح
فوتوغرافيا: مصطفى أحمد
Aladdin said,
December 12, 2006 at 9:58 am
أولا صورة معبرة اوي عن الكلام المعبر!
القصيدة واخدة بحر خفيف متسق تماما مع الموضوع اللي انت بتتكلم فيه بس “مارحتش من مناخيري” مش ملاحظ انا تقيلة شوية؟!
عموما هذه القصيدة وغيرها من أسبابنا الوجيهة بفرحتنا بيك يا بشبوش!
tagreba said,
December 12, 2006 at 2:23 pm
يا لول ما هي الريحة بتفضل في المناخير مش في حتة تانية، مفيهاش حنتفة دي، اعمل ايه يعني، وتسلم يا كبير
Moia said,
December 12, 2006 at 8:19 pm
gamela gamela gamela
ali said,
December 13, 2006 at 5:28 pm
رائع كأني رجعت عيل !! لكن انت مين , أقصد انت ايه ؟
tagreba said,
December 13, 2006 at 8:07 pm
مويا: اشكرك يا مويا، انتي اجمل
علي: سعادتك يمكن تقصد تسألني: انت ازاي؟ وساعتها ممكن اجاوبك واقولك أنا: كدة.. وانت؟
دينا فهمي said,
January 3, 2007 at 11:40 pm
“لسه قلبي ما احتاجش لبديل”
لمستنى جدا
tagreba said,
January 4, 2007 at 1:08 am
dina:
maii khater said,
April 30, 2007 at 10:00 pm
بجد جميله اوىىىىىىى
و معبره اوى اوىاوىى