12.15.06
زي اللي حصل في الرواية
أنا خايف يحصل لنا زي اللي حصل في الرواية
يعني انت مثلاً تروي الرواية
تطرح حدايا
أو انا مثلاً أحكي الحكاية
فيغمض الشباك
وهكذا
وخايف اموت قبل ما اقابله في المنتزة..
صدفة
أو في واحة الدرة الناشفة
أو في أي بلد من بلاد الله
عموماً يعني لو أنا مُت
قول له أنا فُت ملقتهوش
وقول له يبني لي بيت
ويكتب عليه: بيته اللي مسكنهوش
ويسد بابه بمراية
لإني خايف جداً
يحصل لنا زي اللي حصل في الرواية
بيقولك معايا اللي بان واللي
واللي لسّه
وبيقولك هربْت في قطر كان قبلي
لا بيبـــحّر ولا يرسى
وبــــيقولك انا مقدرش
ما احلمش بيك معايا
وبيقولك ما تستخسرش
تحلم معايا بيك
ولو قتلوا المراكب والصيادين
ورشوا سوق السمك نفتلين
وخبوا البحر في نقاية
ما تستسلمش..
لإنه صدقني
خايف يحصل لنا زي اللي حصل في الرواية
Nour قال,
ديسمبر 16, 2006 في 5:56 م
انا اللى دلوقت خايفة يحصلى زى اللى حصل فى الرواية المدونة دى ازاى مدخلتهاش قبل كده؟؟؟
tagreba قال,
ديسمبر 16, 2006 في 11:05 م
ملحوقة.. فاتحين اربعة وعشرين ساعة وخدمة توصيل الطلبات للمنازل كمان
MONBYH قال,
ديسمبر 17, 2006 في 12:47 م
عموماً يعني لو أنا مُت
قول له أنا فُت ملقتهوش
وقول له يبني لي بيت
ويكتب عليه: بيته اللي مسكنهوش
اه والنبي ابقي قوله …
hesteruaa قال,
ديسمبر 18, 2006 في 2:49 ص
تسلم ايدك يا عمر يا فنان
خبو البحر فى نقاية
ايه الجمال ده
tagreba قال,
ديسمبر 18, 2006 في 12:08 م
مونبيه: يوصل
أحمد: ربنا يروّق بالك يا حبيبي، تسلم