12.22.06
مرثية للشيخ وريحة زمان
الله يرحمك يا شيخ “ممدوح”، كدة يا راجل يا طيب تموت قبل ما تغني في فرحي، ده كلام؟
لا أوْحَشَ اللهُ مِنكَ يا شيخ ممدوح
لا أوْحَشَ اللهُ مِنكِ يا روح بتروح
أنا مش هاعتــب عليـــــك
عَـــدَم غُنـاك في الفـــــرح
آديـك مشــــــــــــــــــــــيت
ومجـــــاش معــاد الـفــرح
يــادي الفــرح لو جــيــــت
مين اللي صوته يفــــــوح
وَجْد وغــَـزَل..تنكيـــــــت
عشق وطرب مشـــــروح
لا أوْحَشَ اللهُ مِنكَ يا شيخ ممـــــدوح
في الفجر من رمضـــــــان
في ســـاعـــة التـسـابيـح
صوتــــك يـِرُج المــقــــام
بتلاوة وبتواشيـــــــــــــح
بنعــــــرفه على طــــــول
في آخــــــــر الأذكــــــــار
سبت الـــدُعــــا تذكــــــار
حِسّك مكانـــش خجــول
حِسـّـــك مكانش صريــح
تلـِّــجت من رعشـتــُـــه
والناس كما أنســـــــام
وانت على حضرتــُــــه
تــَـــدعو صـلاة وسـلام
وانت مِدوزن مـقــــــام
الراحــة في التراويــح
زيْ اللي ناوي يـــروح
لا أوْحَشَ اللهُ مِنكَ يا شيخ ممــــــــــدوح
روّحت سايب في بـالي لـيالي الطبطبة
وانا كنت عيـــــــل باردّد
ليه “يا نسـيم الصَـبــــا”
مـِـصــاحب الصُحبـــــة
وموّنــس الأغـــــــراب
لـــيه انت تحـديداً
بتودّنــا شجـــونك
وتتريق..
على ضلمة عـيــونــك
وروحـــــــــك الأشطر
تتـــــجلى بينهم غرام
وقلـبــــــك الأنــْـــــوَر
كَفّاك غُـنــاك يا كفيف
كَفّاك غُـنـاك يا شفيف
وف زهوة التـصقــيف
تتهز من عــُــــــــربة
تزعق كما درويــــش
ما نحســـــش الغربة
الله علــيـــك يا احمد
تسلم ايديك وتعيــــش
حبـيـت ما بينكو السهر
الفتــّـة يا ام عُمـــــر
السيكا يا أنغــــــــــام
ريحة بنفسج في صوتك
فينك يا شيخ عـُمـــــران
قد حـــــــــان آذان الفجر
وقد شـُـــفي المجـــروح
لا أوْحَشَ اللهُ مِنكَ يا شيخ ممدوح
وتنفرط من السبحة كمــــــان حبـّة
مكنتش قادر تستنى يا الزمان حبـّة
تستنى مـيـــــــــــــن
واحنا المستعجليــــن
واحنا اللي بـنـــروّح
من غير معاد واضح
من غير وداع مُرضي
بـقيـت بتــاخد روايح
ومعادش فـيك تــــدّي
أيا زمن
دعنا لنتلو ما تيــسر
من أحسن القَصَصْ
نتملــّى اكــتـــــــــر
في العيون والقِصص
دعنـــــــــــــا لنـشـدُو
في ذكرى قلبٍ شَخَص
وفــــــــــــــازَ بمـحبة
ما كنتش قادر تستنى يا الزمان حبـّة
وانت يا والــــــــــــدي
بتكتب غنوة لاصحابك
تطاوعك الـقـــــــــافية
وتفيضي يا أسامـــــي
زرعتها في قلبـــــــي
بقــْيــِت على لسانــي
“اسمه عبده..
اسمه سامي
اسمه من بين الأسـامي”
راحت ليالي زمان
خيرٌ من الأحـــــزان
ذكرى تــَعودُ الروح
لا أوْحَشَ اللهُ مِنكَ يا شيخ ممدوح
عمر 22 ديسمبر 2006
Aladdin قال,
ديسمبر 23, 2006 في 2:32 م
لا أراك الله مكروهاً في عزيز، يا ريت لو عندك أي عمل للشيخ ممكن ترفعه لنا عشان نستمع ونترحم عليه ….
tagreba قال,
ديسمبر 23, 2006 في 11:21 م
أشكرك يا علاء، هو كان من هؤلاء الذين لا نعي خسارتهم إلا بعد وقت طويل، عالم فقيه وقارئ عظيم ومنشد قدير وفنان تقيل وإنسان ولا أجمل. جاري جمع تراثه الفني ونشره بشكل يليق به قريباً إن شاء الله، نسألكم الدعاء
محمد قال,
ديسمبر 24, 2006 في 1:58 م
فى الحقيقة انا صاحب مدونة جديده … و باكتب فيها بعض من تجاربى فى الحياه كمصرى بيحب وطنه… و يتمنى انه يبقى وطن حقيقى…حاليا باعيش فى انجلترا…المهم علشان ما طولش عليكم و اعطل وقتكم…اتمنى اضافة اسم موقعى الى قائمة مواقع صديقه بمدونتكم:
عنوان موقعى كالآتى:
http://kalambelmasry.blogspot.com/
و اسم المدونة “حدوته مصريه على المصطبه”
مدونتى عباره عن حدوته مصريه على المصطبه …احكيها لابن بلدى المصرى البسيط “عبده” …و هى حكايه سهله بس عويصه …اتمنى انها تعجبكم
محمد الرفاعى
انجلترا
محمد علاء الدين قال,
ديسمبر 25, 2006 في 2:33 ص
بديعة
بديعة
بديعة
و اللهم اسكن الشيخ ممدوح فسيح جناته في الآخرة، كما اسكنتنا يا عمر فسيح جناته في الارض
شوق الياسمين قال,
ديسمبر 26, 2006 في 1:05 م
اللهم اغفر لحيينا وميتنا وشاهدنا وغائبنا كبيرنا وصغيرنا
tagreba قال,
ديسمبر 26, 2006 في 2:40 م
محمد: اهلاً وبالتوفيق
لول: آمين
شوق: آآآآمين
maii khater قال,
أبريل 30, 2007 في 9:53 م
رحمه الله