12.31.06
لا تشبُكيني والنبي
نداء إلى أصحاب القلوب الرحيمة ومحبي البسطرمة بالبيض
لا تشبُكيني والنبي
فإنّ لي قلبٌ صَبي
يحلو له مرحُ الغرامِ
لكنه.. مُــتـقـلـبِ
لا تشبُكيني والنبي
لا تشبُكيني في الهوى
اخضرّ قلـبي فاستوى
ولا من زرع ولا من روى
غير عطشي وانتي بتشربي
لا تشبُـكيني والنبي
لا تحرمي صمتي السكونَ
وتـُجهدي فيّ الظنونَ
فقد يكونُ العلمُ مُـشــْقِ
والعشقُ علمٌ غـَيـــهبي
لا تشبُكيني والــــنبي
ولا انتي لما..
وانا لما كنتي
تنفض لمّة..تطرح جنينتي
تلمي انتي كلامي كله
يتلموا تاني وتهربي
لا تشبُكيني والنبي
ليست بيوتٌ بل هيَ
مترادفاتٌ مُلهية
ياللي انتي هيّ ومش هيَ
أي الضمائرَ ترغبي
لا تشبُكيني والنبي
(لا) تنفي والثابت مفيش
جزمي بـ (لمْ) مهمّنيش
وباعيش في دواراية سكون
فيا تسكني.. يا تغرّبي
لا تشبُكيني والنبي
31 ديسمبر 2006
محمد علي قال,
ديسمبر 31, 2006 في 11:23 ص
الموضوع ده جميل قوي
أسلوبه ممتاز طحن
بيفكرني بالموشحات اللي قريتها ….هوة طبعا مش موشح
ألفاظه ممتازة بس أنت مزجت بين العامية والعربية الفصيحة
القافية بتاعته جميلة مع إن الكسر بيليق أكثر في الحزن
tagreba قال,
ديسمبر 31, 2006 في 1:10 م
والله يا محمد انا باعز الكسر في الحزن وغيره، بس هي طلبت معايا كدة، بارك الله فيك
عمرو عزت قال,
يناير 2, 2007 في 3:39 ص
حلوة
لحنها دي يا عمر
و لك عليّ أتوسط لك عند شكوكو يغنيها
tagreba قال,
يناير 2, 2007 في 3:55 ص
يا رااااجل؟ ده انا مضيت مع سعد الصغنن خلاص، يللا بقى مالوش نصيب شكوكو
دينا فهمي قال,
يناير 3, 2007 في 11:36 م
عجبتنى جدا
وعناوين مواضيعك حلوة اوى D:
tagreba قال,
يناير 5, 2007 في 1:54 ص
شكراً دينا، اهلاً بيكي
بنت الحياة قال,
يناير 8, 2007 في 9:46 م
ليست بيوتٌ بل هيَ
مترادفاتٌ مُلهية
ياللي انتي هيّ ومش هيَ
أي الضمائرَ ترغبي
لا تشبُكيني والنبي
عمر، يا أصغر أجمل شاعر باحبه
هايل … المزيكا حلوة أوي في النص ، بس بلاش (والنبي) تسمعها لحد مالاخوان ..
يا عمر ما بتشوفش اللي بيتنشر الأيام دي؟! دا أنا لما بامسك حاجة جديدة أقرأها بحس ان فايدي غسيل مبلول مش كتاب
عمر لازم تنشر بجد
ربنا يزيدك ويحفظك يا رب
tagreba قال,
يناير 9, 2007 في 12:08 ص
لو النشر هيكافئني بنوعية المكافآت اللطيفة زي كلامك ده، فأنا هاسعى له جداً، مودتي يا فاطمة
maii khater قال,
أبريل 30, 2007 في 11:49 ص
بجد انت روعععهههههه
انا بقالى يومين بتفرج على حبة حجات فى المدونه
و قلت هرد بعد ما اكمل
بس مقدرتش
جامده جداااااااااااااااااااا
tagreba قال,
أبريل 30, 2007 في 12:58 م
الله يكرمك يا ستي