01.14.07
المرجحة والزحلقة
تمت كتابة هذه القصيدة باستخدام أحدث تقنيات الاستشعار عن بعد
المرجحة والزحلقة
ليهم معاني مبحلقة
فلسان وغاوي الشعلقة
وآدي النتيجة
أرابيسك ناقصه المعشقة
والذكريات متبعزقة
أنا قلت استحمل بقى
وآدي النتيجة
يا واقفة بتعدّي النجوم على الطريق الصحراوي
يا ضحكة.. ياا بنت هموم
البحر بيداوي
وانا معدّاوي على ضحكتك مقدرش غير اضحك
وانتي بتداري على دمعتك
تاخدني تنشيجة
وآدي النتيجة
البنت معرفهاش لكني باعرفها
في عنيها.. إنها عارفة
إني باعرفها
احنا اللي سابق معرفتنا قديم
أرواح بتتسابق
ونديم يطيب لنديم
يادي النعيم..
ويادي الحزن
تحويجة
وآدي النتيجة
متعبّينيش غنا في شريط
تنسيه في دواليبك
لو كان غنايا بسيط
هيلف ويجيبك
هيلف ويغازلك
وان كنت مُعتزلك
تبقي انتي واحة بعيد
تبقي انتي آخر الطريق
اللي مالوش آخر
اللي مالوش سكة
لون السما ساخر
والضحك في السكة
حاجزاه إشارة مرور
مستني لون النور
والشعر للتنويه
بيصدّر القافية
والبحر للتمويه
غطسان في تمويجة
وآدي النتيجة
13 يناير 2007
CAESAr-DIABLo قال,
يناير 15, 2007 في 4:33 ص
wow .. wow .. amazin .. i like it .. its wow bro .. keep it up plz
Aladdin قال,
يناير 15, 2007 في 11:14 ص
هوا دا شغل “المعدّاوية” بحق وحقيق! جميل انك خلتنا نطير للسما والنجوم ونسافر بالميكروباص ع الطريق الصحراوي ونشم ريحة الدواليب ونسمع صوت الضحكة والشرايط القديمة!
وكويس أنك أكدت على هويتك “المعداوية” عشان انتا عارف المغرضين الـ anti-Maadists زي “لوون وولف” وشيعته!! ههه
tagreba قال,
يناير 15, 2007 في 11:49 ص
سيزر: الله يكرمك يا بيه
ولتعيش المعادي حرة مستقلة وسلم لي ع المراجيح في كل مكان
لولٌ: أولاً مكانش ميكروباص دي كانت عربية ملاكي، انا اغتنيت مؤخراً، ثانياً متوقعنيش مع لوون عشان لوون حبيبي يا شرير
اياد قال,
يناير 15, 2007 في 3:47 م
اى
amr issa قال,
يناير 16, 2007 في 12:42 م
(احنا اللي سابق معرفتنا قديم .)
الجمله دي رشيقه جدا قولا وسمعا.
والقصيدة تستحق القرايه اكتر من مره ودا اللى انا عملثو….يا معلم سلطان .
وآدى النثيجه.
tagreba قال,
يناير 16, 2007 في 6:38 م
إياد: لا مؤاخذة يا عمنا
عمرو: ولله الأمر
سامية قال,
يناير 18, 2007 في 10:54 ص
إيه يا عم ده!!! إيه الحلاوة دي! إيه القافية دي وإيه القفلة دي!!؟؟؟ حتة نهاية! والشعر للتنويه
)
بيصدّر القافية
والبحر للتمويه
غطسان في تمويجة
وآدي النتيجة
….
من أجمل ما “لعبت” يا عمر! وباقول “لعبت” لإن بابا كان بيقول (اعتقد في التسجيل الإذاعي اللي عندك) ان الشعر هو انك تكتب اللي انت حاسس بيه أو اللي عايز تقوله، وأنت تلعب!وانت في القصيدة دي لعبت أحلى لعب
ربنا يفتح عليك كمان وكمان
tagreba قال,
يناير 18, 2007 في 1:20 م
آمين آمين
monbyh قال,
يناير 22, 2007 في 9:42 م
متعبّينيش غنا في شريط
تنسيه في دواليبك
لو كان غنايا بسيط
هيلف ويجيبك
هيلف ويغازلك
وان كنت مُعتزلك
تبقي انتي واحة بعيد
اصلان تبقي بتهرج ..
لو حتي فكرت ..
وادي النتيجة يا عمر ..
اروح واجي
الاقيك عملت صورة
فيها مرجيحة وزحاليق ..
صورك متلونة ..
تحياتي ..
ياسمين حميد قال,
يناير 29, 2007 في 8:18 م
أحلى نتيجة
!!!
كتابتك جميلة ومعبرة
maii khater قال,
أبريل 30, 2007 في 9:42 م
تبقي انتي واحة بعيد
تبقي انتي آخر الطريق
اللي مالوش آخر
اللي مالوش سكة
لون السما ساخر
والضحك في السكة
حاجزاه إشارة مرور
مستني لون النور
الله على الكلام
سلمت يمناك