02.13.07
سـمـاح
صحيت من النوم
مسامح الدنيا
ومسامح هدومي
ورجليّا وايديّا
وكل التراب اللي فوق الصور
مسامح غياب القمر بالشهور
وكل الشوارع اللي ضلمت عليّ
وزحمة فراقنا
ومُر السفر
سامحت اللي عاتب
وناسي يواسيني
سامحت كراريسي ومُدرّسيني
وغمضت عيني
وسامحت اضطراري
ف لحظة هبوطي
عفيت عن سكوتي
فهمت احتياجي
عفيت عن شرودي
بقهري ومزاجي
وفيّ حيل اطبطب عليّ ف وَجَل
سماح مُرتجل
وزهوة رضا
فإن حان الأجل
وحلّ القضا
سامحني يا ربّي
وفرّح حبايبي
وحنّن قلوبنا الضعيفة الحزينة
إذا ما بعدنا
فعفواً وقـُرباً
وإذا ما قَرُبنا
فبارك علينا
وقرّب مُنايا
أنا إذ أتوب
يا رب القلوب
سماحاً سماح
moia said,
February 13, 2007 at 11:19 am
سامحني يا ربّي
وفرّح حبايبي
الله عليك يا عمر.. الله على قلبك اللى بيحس كده
ربنا يسامحك و يكرمك
Amira said,
February 13, 2007 at 1:54 pm
الله يا عمر… حمدالله على السلامة.. ربنا يارب يسامحك ويسعدك ويحقق لك كل ما تتمنى يارب وتبقى حياتك اللي جايه كلها رضا وسماح وفرح ياعمر
monbyh said,
February 13, 2007 at 9:25 pm
وسامحت اضطراري
ف لحظة هبوطي
عفيت عن سكوتي
فهمت احتياجي
عفيت عن شرودي
بقهري ومزاجي
وفيّ حيل اطبطب عليّ ف وَجَل
سماح مُرتجل
دي لحظة بركة صافية
نادرة …
تحياتي يا عمر
سامية said,
February 14, 2007 at 2:29 am
الله الله الله الله الله الللهههه يا عمر! مش عارفة أقول لك غير الله! قصيدة فوق الوصف وفوق التعليق وفوق كل حاجة!! ربنا يفتح عليك كمان وكمان يا شاعر جميل وبني آدم أجمل
حسام فخر said,
February 15, 2007 at 1:20 am
أولاً يا عمر أشكرك على زيارة مدونتي وتعليقك الكريم. أنا في انتظار رايك في العمل الجديد
ثانياً يا سيدي من حوالي يومين كده في ليلة أرق وبرد نيويوركي قارس فتحت الإيميل حوالي الساعة أربعة ونص لقيت صديقتنا العزيزة سامية بتقول يا ناس لازم تقروا القصيدة دي.
كتبت لها فوراً وقلت ده شاعر عظيم
القصيدة رائعة وهزتني من جوه خالص
نسيت أقول لك القصيدة اسمها “سماح”
برافو يا أستاذ
يا انسان جداً
أنا حاتابع مدونتك بدقة وباهتمام وطبعاً بحب شديد
tagreba said,
February 15, 2007 at 10:19 am
يا مويا يا مويا يا مويا.. آمين
أميرة: يسمع منك ربنا يا شيخة
مون بيه: انا اللي تحياتي وسلاماتي واحتراماتي يا ستي
سامية: يعني بجد انا مش عارف اقول لك ايه ولّا اعمل معاكي ايه، أسعدك الله وأكرمك يا أميرة يا بنت الأُمرا
حسام فخر: اهلين اهلين
انا الظاهر عملت حاجة كويسة ف دنيتي عشان ربنا يكافئني بعقد الفل والياسمين ده.. تسعدني طبعاً بوجودك ومتابعتك دايماً، ويديم الود
حسام فخر said,
February 15, 2007 at 9:32 pm
عمر
النهارده قعدت فترة طويلة مع مدونتك ادعبس واروح من شعر لتصوير لموسيقى لأدب رحلات
انت عملت حاجات كتير أوي كويسة وملهمة في دنيتك
يعجبني حماسك حتى وان اختلفت معك في بعض التفاصيل
ويسعدني سعيك للكمال الفني حتى وان كنت أراه مستحيلا
عشان كده ننتظر منك الكثير والأكثر
والجميل والأجمل
و ده طبعا بيجيب معاه الصعب والأصعب
بس هي شيلة لازم تتاخد على بعضها
لك احترامي
tagreba said,
February 16, 2007 at 7:17 pm
تعليقك جاي ف وقته بشكل غريب يا حسام.. انا شخصياً مختلف معايا في تفاصيل كتير، مش في شوية وخلاص.. لكن البحث نفسه فيه حياتي، وباحتاج دايماً مساعدة ونصح وونس من ناسي وحبايبي، اللي يسعدني تكون منهم يا حسام، متحرمنيش من آرائك وافكارك وتعليقاتك، إلى أن نلتقي إن شاء الله.. ودّي
ماشى الطريق said,
February 16, 2007 at 11:47 pm
جميل والله يا عمر
الواحد بينبسط جداً لما بيلاقى نفسه فى المود ده
جيرونيمو said,
February 17, 2007 at 4:53 pm
سماح ….
والنبي حببتني ف اسمي
وكمان سماحا سماح ….
ده انت غلبت طلب السماح حبيبي قلت سماح حبيبي
وسماح يااهل السماح
ممكن كلمات زي دي تتلحن ياعمر ولا صعبة
واهي تبقة اكس كلوسيف هدية ليا ف عيد الام
مش انا زي مامتك الصغيرة
جميلة قوي بجد
camellia said,
February 18, 2007 at 7:22 am
جميلة اوى الحالةدي وجميل تعبيرك عنها بالاسلوب الصافي ده شكرا ليك انك بتكتب كدة وشكرا لربنا ان في ناس بتكتب كدة
واتمني انك تشرفنى في مدونتي
http://inmytrain.blogspot.com
Hamuksha said,
February 18, 2007 at 10:57 am
عمر، شغلك ف الشهور الأخرانية متطور بشكل مذهل.
أنا عن نفسي مسامحك ع القصايد القديمة.
tagreba said,
February 18, 2007 at 12:20 pm
الله يكرمك يا سماح، لأ هي مش سهل تتلحن، لكن بالنسبة لك ممكن نعملك طقطوقة صغيرة كدة تليق بالمقام العالي بس ممكن تخلص على عيد العمال وعليكي خير
tagreba said,
February 18, 2007 at 12:25 pm
خطوة عزيزة يا كاميليا هانم، الاسم ده عزيز عليّ جداً، شكراً على كلامك على وعد بالزيارة فوراً
tagreba said,
February 18, 2007 at 12:27 pm
ههههههههههههههههه، ماشي الحال.. وشايل كل ده ف قلبك وساكت يا حمكشة
alzaher said,
February 18, 2007 at 10:11 pm
maybe the illustration of you and your personality is this poem
keep up the good work
أحمد الديب said,
February 19, 2007 at 7:25 pm
ياسي عمر
بقالي يجيي ساعتين وشوية في عالمك الذي كنت جاهله
ربما او لازم اوياريت نتقابل في يوم جميل
تحت جميزة
اوحتى في الفضا
وحطيت رابط لموضوعك عن اسكندريلا في صفحتهم في منتدى سماعي
http://www.sama3y.net/forum/showthread.php?p=54861#post54861
وعاملين قسم بحاله وماله للتجارب المبشرة
تعالى بقى اعملنا موضوع عن الجميزة
وعيش معانا شوية
على فكرة عندي الحان كويسة لأشعار مولانا فؤاد حداد
من زمااان
tagreba said,
February 19, 2007 at 11:58 pm
يا أحمد افندي.. انا اللي ممنون قوي بزيارتك دي
ويسعدني مقابلتك طبعاً في أي وقت، باقترح تحت الجميزة اللي ورا وزارة الحقانية
حسام فخر said,
February 22, 2007 at 3:46 am
يا عمر
أنا سعيد وفخور إنك تعتبرني من ناسك وحبايبك
نونس بعض
ونضحك من قلبنا مع بعض
ولو لزم الأمر نعيط على كتف بعض
ونتثارى
بس والنبي ياشيخ بلاش حكاية النصح دي
محبتي
tagreba said,
February 22, 2007 at 10:54 am
ههههههه مفهوم مفهوم.. ميجراش حاجة يا سيدي، لو هو ده شرطك يعني
حدوتة said,
February 23, 2007 at 12:34 am
جميلة جميلة جميلة
ماكنتش متخيلة إن السماح حلو كده
zoof said,
March 1, 2007 at 10:19 pm
صحيت من النوم
مسامح الدنيا
ومسامح هدومي
ورجليّا وايديّا
وكل التراب اللي فوق الصور
مسامح غياب القمر بالشهور
وكل الشوارع اللي ضلمت عليّ
يا رب القلوب
سماحاً سماح
الله
elnahlaazeina said,
March 4, 2007 at 8:15 pm
so beautiful
maii khater said,
April 30, 2007 at 9:36 pm
اعطاك الله ما تمنيت
و زادك