05.09.07
النهر في حالته البحريّة
بعد ما دبل الورد الاسمر على شطه
فجأة وبدون مواعيد
النهر اتأمل ف حكايته
وعيّط
قرر يتحوّل بحر
يمكن علشان البحر وحيد
بعيد
مفيش على شطه ورود سمرة
بتدبل فجأة
يمكن علشان البحر بليد
ويادوبك بيفك الخط
بدائي ف غضبه وحبه وتواحيشه
مش مضطر يصاحب حد
كل اللي عرفهم زوار
كل الحكايات فيه أسرار
صنعته إنه يخبيها
يمكن علشان العِشرة
وكسر القشرة
شيء محزن ف المضمون
يمكن علشان الكون
لما بيدّينا الفرصة
على قد ونَسْنا
على قد ما بنخاف م النهايات
النهر ف حالته البحرية
هيشيل الشطين على جنب
الشط الضيق والواسع
هيشيل العُمرين على جنب
العمر الخاطف والشاسع
هيداري النخل شوية
وبيوت الناس هيغطيها
هيلوّن سمكه البلطي الكالح
بجميع ألوان الفرح الاهبل
وهيستغرق ف الطعم المالح
جداً.. جداً
وهيتغطى
وهيغطي
وهيتماهى
وهيستهبل وهيتباهى
وهينسى كل الأعمار
هيغير اسمه وبلده ودينه
في بطاقته الشخصية
ويغطس ف مداه
عمر
محمد طارق said,
May 9, 2007 at 8:44 am
تسلم إيدك … عجبتني قوي
قوي و الله يا شقيق
maii khater said,
May 9, 2007 at 10:31 am
“يمكن علشان الكون
لما بيدّينا الفرصة
على قد ونَسْنا
على قد ما بنخاف م النهايات ”
ربنا يبارك فيك يا عمر
كلامك جميل و محسوس
اتمنى أن يضل النهر نهرا
فروعته أنه نهر
مفهوم..قريب…حانى..
محمد مفيد said,
May 9, 2007 at 1:47 pm
يمكن علشان العِشرة
وكسر القشرة
شيء محزن ف المضمون
يمكن علشان الكون
جامده اوي يا عمر
ازيك يا نجم
محمود عزت said,
May 9, 2007 at 2:26 pm
الله !
يمكن علشان البحر بليد
ويادوبك بيفك الخط
بدائي ف غضبه وحبه وتواحيشه
مش مضطر يصاحب حد
كل اللي عرفهم زوار
كل الحكايات فيه أسرار
جميلة جدا يا عمر
Lasto adri *Blue* said,
May 9, 2007 at 9:43 pm
ياه ع الورد الاسمر… خلتنى اشوق اشم ريحته الباقية..
ابدعت يا عمر … حقيقى ابدعت
tagreba said,
May 9, 2007 at 10:08 pm
ربنا يسعد قلوبكم زي ما بتسعدوا قلبي كدة
Mariam said,
May 10, 2007 at 1:43 am
عمر, كنت عازة أعرف منك ذا كنت ممكن تدي كتابتك دي لفرقة تغنيها؟؟
كماتك جميلة جداااااا
معبرة جدااااو مليانة مشاعر حلوة و دافية….
لو مهتم بانك تديه لفرقة يا رت تقولي عشان أنا أعرف فرقة بتدور على كلمات حلوة تغيها و متكونش في الحب و بس….
تحياتي
Dananeer said,
May 10, 2007 at 3:51 am
الله عليك بجد يا عمر
حلوه اوى و حزينه عشان الورد الدبلان
غصب عنا
افتكره فى احسن اشكاله و ريحته و صوته
اول مره اشوف الفرق بين بحر و نهر كده
جيرو said,
May 10, 2007 at 7:41 am
مجبرين
نتقلب ع الجنبين
بحر
ونهر
ومراحل انتقالية
وحنين
وتقوقع
لما باشوف الدنيا بعنيك
بفرح ياعمر
باشوف ابداع
وجمال
وحاجات بتعدي المنطق
وبافرح كمان
عشان في ناس لسه بتحس الكون
تمام زي ما بحسه
سما
بأحضان مفتوحة
تسلم ايدك يا شاعر
يا مبدع
ناصر النوبى said,
May 10, 2007 at 9:30 am
(الورد الاسمر_الشطين على جنب_بدائى فى غضبة ) مفردات جديدة ومعبرة جدا عن الفكرة مبروك يا عمر دى قصيدة جميلة بس من فضلك لا تجعل النهايات مأساوية .
إبراهيم عادل said,
May 10, 2007 at 10:31 am
عمر .,.. يا صاحب التجربة الفريدة ………
أنا ما عارفش ، كانت فين مدونتك دي عني من زمان ، عارف تجربة عمر تجربة عمر … ف كل حتـة ,,,,,,,,, بس حقيقي قصيـدة حلوة ، أنا مش هاخد مقاطع ، لإنها عاجباني على بعضها
..
.
.
وتحياااااااااتي
maii khater said,
May 10, 2007 at 10:36 am
بعد إذنك يا عمر
انا هنقل ” النهر فى حالته البحريه” للمنتدى عندنا
بجد انا عجبانى اوى و عايزه الكل يقراها
tagreba said,
May 10, 2007 at 1:03 pm
مريم: لو تعرفي حد مهتم بنص معين من نصوصي وشايفه صالح للغنا، فأنا معنديش مانع من حيث المبدأ، تقدري تتواصلي معايا عن طريق الايميل مثلاً وتوصليني بالطرف التالت ونشوف إيه اللي ممكن يتعمل بالظبط، طبعاً شيء يسعدني، متشكر قوي لاهتمامك
tagreba said,
May 10, 2007 at 1:05 pm
إبراهيم، جيرو، دنانير: شكراً من قلبي
ناصر: على قد ما بنخاف م النهايات
مي: أكيد يسعدني ويشرفني، كلك ذوق
علاء الدين said,
May 10, 2007 at 1:56 pm
بديعة “التجربة” الشعرية دي يا عمّور يا أبو التجارب كلها!! مزيكا جديدة (احساسي بيقولي كدا) وكلمات جديدة (مش كلها الصراحة … تأثير “الاغراق في الثقافة المسرحية” و”الإطاحة برؤوس أعضاء الفرقة” لسه قوي، بس كله بيروح ف الغسيل يا شاعر الغلابة والمكسورين (دي صيغة مدح طبعاً)
بي. اس (على رأي لستو) بصفتي ناقد أدبي كبير باعتراف الحكومة .. يا ريت تخلي النهر هوا اللي يكسب والبحر هوا اللي يخسر عشان ما تشمتش فينا “العدو” على أساس اننا من أصحاب “النهر” اللي هاناخد كتابنا بيميننا بينما هم أصحاب البحر سيأخذون الكتاب بشمالهم (أكيد يا عمور أنا مش شوفيني قاهري معداوي “نهراوي” بس شيء من النعرة الجغرافية مايضرش!!)
tagreba said,
May 10, 2007 at 3:40 pm
Mariam said,
May 10, 2007 at 10:08 pm
عمر انت مش متخيل أنا سعيدة قد ايه بسبب ردك السريع عليا… أنامتحمسة جداااا للموضوع.. الايميل بتاعي هو
Mariam.Omran@gmail.com
شكرااا جداااااااااااااااااااااااااا يا عمر
Moia said,
May 11, 2007 at 9:56 pm
على قد ونَسْنا
على قد ما بنخاف م النهايات
جميله يا عمر جدا بجد تسلم ايدك وقلبك.. ربنا يكرمك يا ابنى
على قد ونَسْنا
على قد ما بنخاف م النهايات
يااه يا ربى
حسام said,
May 12, 2007 at 10:36 am
انا حاسس اني خسرت حاجه اني مقرأتش الكلام ده من اول ما نزلته يا عمور
جميله وجديدة. خلاق يا عزيزي والله
ياريت نخلي بالنا كلنا من النهر ومننا عشان ميطلعش من توبه
منار said,
May 13, 2007 at 12:49 am
الاسم حلو اكيد جذاب بس ياريت تكبر الخط شوية علشان السن بياثر فى النظر..ماعلينا مش هقدر اقولك حلوة انت مبهدل البحر وظلمه كتيير..وانا بعترض على كدة بالنيابة عنه..البحر بليد ومتوحش وبدائى ومستهبل فىالوانهو فى غضبة؟؟؟؟
انت نسيت فيضان النيل ولا اية؟؟؟
بس فى المضمون كلامتك رائعه فى النهاية بالاخص..تغير الشخصية من الركود الى الجنون..
وتشبهك للورد الاسود الذى يدبل فجاءه..جائنى اكتر من تصور لها..بس اكيد مش اللى تقصده ..ربما لاننى لم اعاشر النهر..فارجو الافادة فى هذا التشبيه..
ومجهود رائع ..واتمنى المزيد
tagreba said,
May 14, 2007 at 9:47 am
مويا: شكراً للدعم المعنوي المستمر ده
حسام: يللا نعمل ورديات لمراقبة النهر بقى، طبعاً انت وردية بالليل
منار: متاخديش كلامي بمحمل مباشر، الموضوع مش ذم في البحر ولا مدح ف النهر، الموضوع غير كدة خالص، يا ريت تقريها تاني، البحر ده سيد البراح يعني، زي ما النهر سيد العمار، واظن عمار من غير براح مالوش معنى والعكس. شكراً يا ستي
santakarim said,
May 15, 2007 at 1:09 am
7alwa awy ya 3omar, mofrdatha gadeda bas mast3′rbthash , 7alwa bgd, go on
tagreba said,
May 15, 2007 at 11:58 am
شكراً ليك يا فنان يا جميل
hesteruaa said,
May 15, 2007 at 7:03 pm
الله الله بجد
الله ينور عليك يا عم عمر
تسلم ايدك يا صاحبى فين حاجاتك دى من زمان
tagreba said,
May 16, 2007 at 7:48 am
الله يكرمك يا احمد
حضر الجمبري والسبيط واللامؤاخذة، انا نويت والنية لله يا معلم
no more tears said,
May 17, 2007 at 5:03 pm
hello omar
i don`t know what to say , sometimes i feel the words is very heavy on my mouth is that the (shock ) when i heard a beautiful poem like that , so you shocked me my friend ,( my friend of misery ) but one day when we will meet together i will ask you to play it and sing it for me and leave the music solo for me i will do it also i like your poem which called ( about last butterflies )
specially the way you ended it , you know when i heard it on the concert at el sawy wheel , believe me when i tell you , i felt tears in my eyes same as you.
no more tears
soloprincess said,
June 10, 2007 at 10:05 am
النهر في حالته البحرية هو الحرية و القوة. قصيدتك تنبض بالطاقة مثل الشمس.البحر مثل الشمس في قوته و غموضه.والخيل مثل الشمس في شموخها و سفرها عبر الأماكن و الأزمنة دون قيود.هل تعرف شئ آخر مثل الشمس؟
أمين حدّاد said,
June 11, 2007 at 8:13 am
قصيده جميله
tagreba said,
June 11, 2007 at 10:14 am
soloprincess: شاكر لتعليقك البليغ
أمين حداد: يا سيدنا انت اللي جميل والله
moon said,
September 17, 2008 at 11:29 pm
جميله بجد ومعبره لاقصي حد