فوتوغرافيا: عمر - المنزلة - ابريل 2006

صدّقني

أنا أحسن وانا سرحان

بهاء جاهين

فوتوغرافيا: عمر - ابريل 2006 اسكندرية (سامح وحَمَد)

إهداء إلى زنجي وبنات أحلامه

علشان هواكي ريحته فانيليا
طعمه مزازة برتقان
وعشان معاكي مبغيبش ثانية
وباحسّني عايش صحيح

شفت ف سماكي حواديت شقية
بترُدّني لأحلام زمان
وكإنها.. شايفة بعنيّا
وكإني ريشة وهي ريح

والحب ساهل
الحب أصعب
الحب فوق الاحتمال

الحب عاقل
الحب أغرب
درويش يبخّر دنيتي

أغنية بالفانيليا

فوتوغرافيا: عمر

شكلك عازف ربابـة
ضاعت منه الربابـة
تايه بين ميت إجابة
ومعذبـك الســــؤال

شكلك حاسس بحاجة
بين التيه واللـــجاجة
أو معلول باعوجـاجة
في فهم الاحــــتـمال

شكلك عمّال تفكر
في أقل ولا اكـــتر
هو مزاجك معـــكر
ولا انت بألف حال

عينك مش باينة منك
وأكيد ده مـــش أدب
ومكان القلــب وَسَعة
ولا قـلــة خــــشـب؟؟

أهلاً يا زميل

أخينا ده لقيته امبارح في محل انتيكات افريقي فجبتهولي هدية، ويخلق من الشبه أربعين*

الصورة أعلاه وباقي الصور من تصاويري.. خدتها ف لحظة.. ولا بلاش **

فوتوغرافيا: عمر

مع تحيات زنبوووء الجنينة

فوتوغرافيا: عمر مصطفى

سيوة نوفمبر 2005

عيِّل..

ماشــي و دراعـي

فى كـــف ابويـا

لكن عنيّا في ألف منظر

مصاحبة نور الفترينات

وودانى بين السماعات

حافظة أغاني الاعلانات

وعــــارف امتى..

ابدأ أعيّـــــط

وامتى اتنطط و اهلل

عيِّل..

باحب ده علشان باحبه

و مابكرهــــوش..

حتى لو كان مش جميل

و لسّــــه وشّى..

محتاجش لرتـــوش

و لسّه قــــلبي..

ماحتاجش لــبديل

باحلم بنفسي طويل طويل

واما يجينى نعاس باميِّل

عيِّل..

بابني البــــيوت..

من مخدات الصالـون

والعب مع بنت خالي

عــروسة و عريس

والعب حرامية و بوليس

كائن ماليش ف العكننة

و ماحبش الأمر الغليظ

و قلبي يبدأ لارتعـاش

لما الســما تبدأ تليّل

عيِّل..

عمرى ما حسيت بالملل

حتى فى أوقـات الزعل

حتى ف أوقـات الملل

عمرى ما حسيت بالملل

و كل لحظة تعــدّي

يتخزن شعــــور..

و كل ريحة و كل صوت

ما رحتش من مناخـيري

ريحة البارفانــــات

ولا راحت من عنيّــا

أشكال البيــــوت..

حُـــضنك يا ستـّي

لحن مالهـوش أى صوت

شوقي للأفــــراح

تواتى..

صبري ع الأحــزان..

تفوت

أنا عايز اشــــوط..

كورة

واجيب مليــون هدف

عُـــــمري اتحدف

لكن ف لحظات بابـقى..

عيِّل..

من ديوان : أسباب وجيهة للفرح

فوتوغرافيا: مصطفى أحمد

أنا ماعرفش ايه اللي حصل للدنيا، بقت وحشة ليه كدة؛ عادل سلامة صديقي العزيز بقالنا سنين مع بعض، شاعر عامية جميل، وإنسان أجمل، ياما سافرنا سوا وكتبنا سوا، واتشحتفنا سوا وشفنا مع بعض الحلوة والمرة

يعني راجل زي الفل، وليس عليه غبار من أي نوع، ولما بييجي عليه غبار بنلحقه بسرعة وننفضه، تقوم آخرة المتمة يا عادل يا سلامة، تبقى بلوجر، مدون يا عادل؟ هي دي الصداقة، هي دي الإنسانية والإبداع والحاجات الجميلة.. لا لا لا، مكنتش اتصور ابداً انك تعمل كدة

عموماً انا هاشهدهم عليك عشان يعرفوا قد ايه الدنيا بتغير في الناس، ولا حول ولا قوة إلا بالله

عنوان المدونة بتاعة البيه

http://shahtafa.blogspot.com

أنا وضلّي وشمس ورايا
وبحر فضل لي بعد السفر
وكون بيتفرج عليّ باخد الأنفاس
بعيدة بعيدة يا مركبة وحيدة
قريب قريب يا ضلي الوحيد
هناك حبيبين..
بيتونسوا بسرقة زمن
وهناك زمن..
بيتسلى بسرقة ناس
وكون بيتفرج عليّ باخد الأنفاس
وعمري سايبه في الهوا
ينشف من الميّا
وروحي تنزل الميّا
ولا تتبل
وانا لوحدي
أنا وضلّي وشمس ورايا
وبحر فضل لي بعد السفر

عمر
اسكندرية 17 نوفمبر 2006

مجموعة صور من الحفل الأخير لجميزة في ساقية الصاوي يوم 4 نوفمبر. شكراً من كل الفريق لكل اللي تعب وجه وغنا معانا.. وشكراً لمحمد الشرقاوي على الصور العظيمة

ر ابط للصور