حاجة كدة كتبتها ودندنتها في نفس الوقت بصوتي بس ومن غير مزيكا، افتكر كدة كفاية عليها.. وعليّ

:-) 

آخر كلام 

حسن الحجيري صديق بحريني عرفته في برنامج سفينة شباب العالم في اليابان من سنتين، وهو رجع تاني لليابان ومقيم فيها حالياً للدراسة. حسن عازف عود جميل ودايماً كان بيجمعني بيه اهتمامنا المشترك بالمزيكا خصوصاً إنه كان عندنا الفرصة إنه نعيش ده مع بعض شهرين كاملين في عرض المحيط. هاسمّعكوا تجربة موسيقية مشتركة بين حسن على العود وبين صديق أسباني ليه عايش برضه في اليابان بيعزف على آلة يابانية تقليدية اسمها “شاكوهاتشي” هي من آلات النفخ وصوتها أقرب للناي أو الكولة عندنا.. التجربة عجبتني وحبيت تشاركوني استمتاعي بيها

استمع: عود وشاكوهاتشي

إهداء لإياد ولميس ولكل اللي اختاروا يحبوا بعض في هذا الزحام

إيه كان واخده إيه
للقصايد والأغنيات
غير غيطان خضرة ف عنيه
غير قلب مليان حدّوتات

كان مرة فارس
من غير حصان
كروان ومن غير اجنحة
قابل أميرة روح الحنان
ضحكة عنيها مفرحة
طب كنتي فين
طب كنت فين
طب كنا فين من زمان

شعر ولحن وغنا بالمرة: عمر

ملف الصوت: من بروفة لجميزة (ناصر، نورا، تميم، منير، رضا، رامي، ياسر، نور، عصام) قشطة عليكوا

الغنوة دي باكورة إنتاجي الجديد في جميزة بعد النيولوك، كتبها ناصر النوبي وإياد أبو بكر سوا، واتعلمت انه التلحين تحت تهديد الحاجات ممكن يبقى مُجدي أحياناً. الغنوة أداء تميم ومنير وتوزيع جميزة، المرة دي اللينك هيشتغل ان شاء اللــــــــــــه

يااااه

لو ينسى الشارع يااااه

والبنت تسافر جوّاه

مجنون لو صدّق إحساسه

إنه مخطوف أو تاه

والحلم الأخضر يتبخر جوّاه

أنا شايف القمرة بتحلم وتفكر

وحصان بيحن لطعم السكر

وسنين بتمر في لحظة صدق

ترحل لبعيد والغربة مداه

ياااااه

نزلوا الغنوة

جميع الحقوق محفوظة لفريق جميزة

بتوزيع عاجبني شخصيا لعازف العود الجميل رامي عبد المنعم اللي انضم لجميزة مؤخرا، وبجزء من قصيدة “علامات كتير” لناصر النوبي وبلحن لاسماعيل فوزي صديقنا وعضو فريق وسط البلد، افتتحنا آخر حفلة لينا بحالة “يا صول التشيللو”، أداء نورا والمجموعة

استمعوا

جميع الحقوق محفوظة لفريق جميزة

أغنية “لبنان غُناكي رجع” من آخر حفلة لجميزة الشهر الماضي في الساقية

شعر ولحن: عمر مصطفى

أداء: نورا وتميم

توزيع: جميزة

رابط الأغنية في نهاية البوست وجاري نشر أغنيات أخرى لجميزة تباعاً

في الصيف تمطر وجع

الأرض تطرح وجود

لبنان غناكي رجع

يوسع الدايرة

يهدي قلوب حايرة

طريق لحياة

بكرة الشتا يمطر دفا

على اللي باقي م الأحبّا

يحضن خطاويهم المرهفة

ويدوّب الأحزان

تسكن غناوي الأمل

وطن مالهش حدود

وترجع اللي تاه

لبنان غناكي رجع

يوسع الدايرة

يهدي قلوب حايرة

طريق لحياة

خللوا الصور في القلب

والحب سيبوه مكانه

دقوا طبول الحرب

ع اليأس والفُرقة

ووزعوا الحكايات

على كل أراضينا

م الأطلسي للفرات

على مين يعادينا

وتعيش يا وطن الأَرز

تبقى يا صوت فيروز

كل الطرق بتجوز

لو للجنوب واخداه

لبنان غناكي رجع

يوسع الدايرة

يهدي قلوب حايرة

طريق لحياة

نزّل الأغنية

جميع الحقوق محفوظة لفريق جميزة

لم يبقَ هنا أحدّ لم يسمعْ ضجتَهم :
أبواقٌ تُنفخُ في السورِ ، بكاءٌِ وعويلٌ مقطوعٌ وصهيلُ خيولٍ
شاردةٍ في شارع

أجيالٌ تهبطُ ، أجيالٌ تصعدُ في كل شروقٍ وغروب
وشهودٌ في حلقاتٍ يمضون الى آلهةِ الموتى بقرابينِ الأحياء
فاذهبْ واسألْ هذا النائمَ في سفحِ الجبلِ الشاهق:
ماذا تفعلُ في عاصمةِ الشيطانِ هنا؟

أيُّ خرائطَ تملكُها في هذا الطوفانِ ، وأيُّ طريقٍ تسلُكُه،
إذ لاعودةَ بعد لآن

إذ كل جسورِك فوق البحرِ طوتها النارُ ، وآثارُك في الوادي
مسحتها الريح؟

قلْ للقابعِ في كهفِه،
متروكاً للوحدة والنسيان:
إنهضْ لترى وجهَك في مرآةِ الحجرِ العمياء
إنهضْ من نومِك واطلقْ صرختَك المكتومة
صرختَك المرةَ في الأذنِ الصماء

مرآة الحجارة شعر: بول شاؤول، لحن وغناء: كاميليا جبران

استمع

العزيز “عمرو عزت” كان طلب يسمع “ارمي حمولك”، إهداء ليه ولكل اللي غاوي جميزhttp://www.soundclick.com/bands/pagemusic.cfm?bandID=514576

خلفية
شعر ولحن: عمر
أداء نورا والجميزة

امبارح بعد بروفة جميزة، سهرت مع العم ناصر النوبي كبير الجميزة، و“ميدو” الصوت اللي بيعجبني جداً شخصياً، ناصر استفزني كالعادة، وخللاني لحنت جزء من أغنية جديدة من قصيدة “كلام فاضي”، اللي هو بيقول: ط

خللينا نستفسر
عن أول الفراشات
عن أروق الينابيع
خللينا لما نبيع
مننتهيش فجأة
خللينا في الزنقة
نغازل الوسعات
وافتكري ليه في الفرْح
ابدعتي في البسمات
وافتكري ليه فعلا
قدرتي ترضيني
وانا كنت مش راضي

النتيجة كانت لطيفة، خصوصاً بعد تعليقات وملاحظات ناصر اللي كان بيشد في شعره بسبب عندي معاه فيها، وخللته يطلع كتاب الأبراج عشان يعرف يتعامل معايا ازاي !!!! وميدو كان أداؤه تحفة، ياريت الواحد كل ما يلحن حاجة، يلاقي صوت جميل زيه يسمعه شغله بجد..عموماً حابب اعرف رأيكم دام فضلكم

إهداء للعزيزة “جيرونيمو”

ملف الصوت: أول الفراشات