09.14.06
نشرت تحت تصنيف تصاوير, موزونٌ مُقـــفـّى في 2:25 م بواسطة tagreba
المدينة الصبح بدري
الشوارع لسّة فاتحة
والمدارس لسّة فاتحة
المحلات..
والحواري
والمجارى
بلكوناتها.. بواباتها
والعيون لسّاها فاتحة
في المدينة الصبح بدري
في المدينة الصبح بدري
العجل ساير وداير
والسجاير..
مالية قلب الميكروباص
والكتب فوق رجل فاطمة
والعينين مليانة ناس
والحناجر لسة عتمة
والإيدين..
بتجس نبض الأمنيات
في المدينة الصبح بدري
في المدينة الصبح بدري
تسبق الرجلين طريقها
والشوارع مش ملاحقة
مــش مـوافــقــة..
والطريق مع إنه واضح
هاجس المجهول مقاوح
واللي جاى مع اللي رايح
كـلــه ســايــح..
فى المدينة الصبح بدرى
في المدينة الصبح بدري
العصافير من كرمها
لسه بتزقزق وتسرح
رغم دخان المصانع
والعوادم والتراب
رغم تلاجة مشاعر
طالعة من ورا ألف باب
إنهيار ساقع وهادى
لحكايات عمالة تجرى
واغتيال الصبح عادى
في المدينة الصبح بدري
أنا
زمان زي اليومين دول
رابط دائم
08.17.06
نشرت تحت تصنيف موزونٌ مُقـــفـّى في 2:09 م بواسطة tagreba
فاكر آخر سحابة صاحبتها وممطرتش
عشان خاطر عيونك دمعت ومدمعتش
حاولت تطلع.. نزلت.. سألت ليه
وفضلت مستني الشتا علشان إجابة
عارف البنت أم عيون إزاز فتارين
احتجت فترة تفهم فرق بين حاجتين
لون الروايح.. وريحة التلوين
وإنك مستكنش في عيون مبتسعش الرحابة
شايف المترو اللي عدى وملحقتوش
الشارع الفاضي اللي زحمة مملتهوش
صوت خطوتك أعلى من زعيق ميادين
وروحك غنوة.. الصبح.. في بيوت الغلابة
فاكر آخر سحابة؟؟
الصورة لمهاب بوب - تصويري
6/8/2006
رابط دائم
07.15.06
نشرت تحت تصنيف ع العالي..سمّعني, موزونٌ مُقـــفـّى في 5:16 ص بواسطة tagreba
لم يبقَ هنا أحدّ لم يسمعْ ضجتَهم :
أبواقٌ تُنفخُ في السورِ ، بكاءٌِ وعويلٌ مقطوعٌ وصهيلُ خيولٍ
شاردةٍ في شارع
أجيالٌ تهبطُ ، أجيالٌ تصعدُ في كل شروقٍ وغروب
وشهودٌ في حلقاتٍ يمضون الى آلهةِ الموتى بقرابينِ الأحياء
فاذهبْ واسألْ هذا النائمَ في سفحِ الجبلِ الشاهق:
ماذا تفعلُ في عاصمةِ الشيطانِ هنا؟
أيُّ خرائطَ تملكُها في هذا الطوفانِ ، وأيُّ طريقٍ تسلُكُه،
إذ لاعودةَ بعد لآن
إذ كل جسورِك فوق البحرِ طوتها النارُ ، وآثارُك في الوادي
مسحتها الريح؟
قلْ للقابعِ في كهفِه،
متروكاً للوحدة والنسيان:
إنهضْ لترى وجهَك في مرآةِ الحجرِ العمياء
إنهضْ من نومِك واطلقْ صرختَك المكتومة
صرختَك المرةَ في الأذنِ الصماء
مرآة الحجارة شعر: بول شاؤول، لحن وغناء: كاميليا جبران
استمع
رابط دائم
11.28.05
نشرت تحت تصنيف موزونٌ مُقـــفـّى في 1:25 ص بواسطة tagreba
افضّي الكلام
وارميه في قلبك يتحرق
سامع غنا بردان
وشفت نورس غرق
وضحكت من قلبي
وباخبي..
وانا عريان
وجعي عن الأحزان
وباداري وانا دفيان
فرحي البسيط بيكي
غجرية في عنيكي
بترقص اسباني
وبتنشر المناديل
يكفي العياط بالليل
زارعين سُكات أشطر
خللينا نستفسر
عن أول الفراشات
عن ارْوَق الينابيع
خللينا لما نضيع
مننتهيش فجأة
خللينا في الزنقة
نغازل الوسعات
وافتكري ليه في الفرْح
ابدعتي في البسمات
افتكري ليه فعلاً
قدرتي ترضيني
وانا كنت مش راضي
كلام فاضي
عمر
رابط دائم
11.24.05
نشرت تحت تصنيف النجمة ام ديل, موزونٌ مُقـــفـّى في 2:44 ص بواسطة tagreba
الخوف
ماهوش كائن خرافي بأجنحة
مستني فوق ضهر الدولاب
علشان ف لحظة يخضنا
الخوف مرض
سرطان بيكبر فوق مراكز حسّنا
الخوف سراب
بس احنا صحرا كبيرة ليه
رابط دائم
06.16.05
نشرت تحت تصنيف موزونٌ مُقـــفـّى في 1:51 ص بواسطة tagreba
إهداء إلى ناصر ونيفين
في الحر
في عز الهجر
لما الترعة بتعمل نايمة
الصبر بيقفل دكانه
الناس هايمة
ومش عارفة على فين
برواز مخنوق البيت
والغيط متعبّي ف قزّاز
للبيع
أو للهجرة بعد البحر
أو للصحرا
وبيلقف أنفاسه الخضرا
عطشان
مربوط من قلبه في حاجة
عصيانة على التفسير
الشمس غفير مهووس
بتهد الروس
وتبخر روح الطين
والناس مساكين
مجانين
جانيين
هيجيبها منين ولا منين
على فين يا عزيز عيني
والسما مرشوقة عيون
وفي طلعة روحه لفوق
يتفك القلب من الترابيط
تناديله جميزة عجوزة
مغروزة في شط الغيط
موشومة في حيط البيت
زاينة المنظر وبهية
جميزته أهية
اللـــــــــه
الدنيا حياة
والاتجاهات موجودة ومش تخاريف
اتكاتروا عليكي ألف خريف
ما اصفرش لونك يوم
متموتش الشجرة المسقيّة
من عرق اليوم
ودموع اللي مقدروش
متموتش اللي جدورها
أساسات لبيوتنا
الا ان متنا
مع إن عينيه
كانت بتشيّع كل ماليه
في جنازة
مقدرش يشيّع ضلـِك
و”أصيل” رابض تحتيها
ماليها حكـَم وغرام
بيملّيها حكاوينا
قال لها عن أوجاع فينا
وكل ما بيزيدها
تورّق
يتوجع أكتر
تتزوق
تثبت
تبعت في الأرض رسايل
يالعود المايل عود
يالصوت الناشف حنْ
الزرعة ايه غير حلم
والتفسير بالموجود
يالعود المايل عود
يالصوت الناشف حنْ
يا عجوزة يا جميزة
يا أمان
يا صبية
يا وصل وحرمان
يا عزيزة
عطشان .. اسقيه
لو متاخد ردّيه
طرح الراحلين الساكن فيه
ميروحش بلاش
والأرض شجر ومعاش
متموتش اللي جدورها
أساسات لبيوتنا
إلا ان متنا
واحنا ممتناش
احنا ممتناش
عمر
12 يونيو 2005
رابط دائم
04.23.05
نشرت تحت تصنيف موزونٌ مُقـــفـّى في 11:41 ص بواسطة tagreba
“ممنوع استخدام النظارات الشمسية”
لا انا قادر عيني اغمّض
ولا قادر عيني افتـّح
لا انا قادر عيني اعيّط
ولا قادر عيني
أفرح
القدرة فين يا عيني
والخضرة منين يا روحي
فاتح ليكي دراعيني
ولا خبيتشي ف جروحي
فاكرك ولا نسيتي
إني مش بافتكر
وسعاية ف قلب غيطي
ف الضلمة بتنفجر
وانا مش قادر يا عيني
اغمّض ولا افتـّح
بابربش آه يا عيني
باحوّش لجل أفرح
يوميني عدّوا لحظة
عدّوا ولا سلـّموش
زهقان من الملاحظة
وباهوّش ف الهاموش
وانا طاير فوق كفاية
من غير أيتها غاية
متطولش الحكاية
بيموتني الملل
“بلـْدانة يا برَدنا”
بردانة يا بلد
وشك وكإنه مادنه
مبتندهش الولد
مبتندهش العيال
جوة احواش المدارس
جوة احواش الحياة
واتمَلـّى ف منتهاه
ألاقيني في البداية
مش فاهم الحكاية
ولا حدايا مدد
ممنوع الشط يضحك
في وش البحر ليه
وطريقتك في المناقشة
دي بتبوّشني ليه
لما اطلع ع المعاش
ولا اقولك..
بلاش
خللي الكلام ما بينّا
متداري ف ضل شيش
أصلي ماليش
ف الصراحة
ولا ليّا ف العياط
قاعد في الاستراحة
باسكـّت ف السكات
ولا قادر عيني اغمّض
ولا افتـّح أو أعيط
نفسي أفرح وازيّط
واعاتبك واحضنك
واعاتبك واحضنك
عمر
رابط دائم
04.13.05
نشرت تحت تصنيف موزونٌ مُقـــفـّى في 9:09 ص بواسطة tagreba
مهداة إلى روح الهَوَى المهجور
باحب اغيب
واسيب مكاني غريب
وتترسم علامة تعجب ساهية
على وشك
وانت اللي لامحني
بطرف عين حسّك
وانا
مستخبي جوة سحارة
وباضحك في سري
شطـّّور بنضارة
أنا
مش هنا
أنا مش هناك
لكن خيالي معاك
وانت اللي في خيالي
تضحكلي لما اظهر
ينطق لسان حالي
وانت اللي ترقيني
تحاوطني بالبركات
تكتب على جبيني
“كان أصله غاوي سكات
كان غاوي يتمرجح”
وادعيلي لجل افرح
في سكة الواحة
أقطفلي تفاحة
من جوة بطن الجبل
يادي الهبل
ده احنا بنتساهر
أتاريني مش قادر
أكتم في أمنية
إني ابقى وحديّة
نوحش في بعضينا
ونسلـّي بينا الزمن
“كان أصله غاوي التمن
يبقى من روحه
يبقى من الأيام“
عمر
رابط دائم
04.10.05
نشرت تحت تصنيف النجمة ام ديل, موزونٌ مُقـــفـّى في 10:43 ص بواسطة tagreba
في لحظة وقوعه من الاوتوبيس
اللي هانه وجري
اتمرمغت كل حكاياته على الأسفلت
واتشعلقت فيه عيون الخلق
بسؤال عبيط
هتعمل ايه دلوقت
حاول يقوم من تحت صخرة وقت
وكإنه عادي
لكنه مقدرشي
وقع تاني
وقع بجد المرّة دي
وقع المرّة دي بجد
عمر
رابط دائم
03.13.05
نشرت تحت تصنيف موزونٌ مُقـــفـّى في 6:03 ص بواسطة tagreba
تحت تحت تحت
خطوة بتعافر
في أرض صحرا
في أرض خضرا
في أرض طين
في أرض بتداري على الراحلين
هنا الربيع مش ورد
هنا الربيع خماسين
حلمي ماهوش ف السما
غير الغيمة العمار
وشمس صاحبة قمر
ماليش أحلام هناك
غير البراح فوقي
تحت تحت تحت
الوردة عرقانة ف ميدان رمسيس
والبت هربانة
بتجري للتحرير
صراصير هنا وهناك
بيعدوا على روحي
وجعك بيئذيني
وانا أخرس الكلمات
حتى النواح هربان
واحشني يا نوحي
يا غنوة فوق في السما
روحي هنا ع الأرض
بريحة الخوف
بريحة الشاش والجروح
ونظرات الوداع
حلمي مفاجئ بطئ
عبيط قوي وعبقري
أنسى وتتذكري
مش عيب نعيط سوا
يا وشوش حبيبتي
ساكنة مدينتي المفترية
ساكنة الوسية
والواحات
يا بلاد بتغزل سكات
بشويش على اللمات
الخيط مالوش آخر
والبركة في الوسعات
تحت تحت تحت
في اغوط ابيارك
في أبعد صحاريكي
في أبسط جدع فيكي
وفي أطيب بنية
حلمي سواسية
معدية
يا نهر نازف ناس
يا جنة حقيقية
يا روح هوا النايات
يا وسعة السماوات
حلمي هنا
في الأرض
تحت
تحت
تحت
عمر
13 مارس
رابط دائم
