June 16, 2005

الجميزة

Posted in موزونٌ مُقـــفـّى at 1:51 am by عمر مصطفى

إهداء إلى ناصر ونيفين

في الحر

في عز الهجر

لما الترعة بتعمل نايمة

الصبر بيقفل دكانه

الناس هايمة

ومش عارفة على فين

برواز مخنوق البيت

والغيط متعبّي ف قزّاز

للبيع

أو للهجرة بعد البحر

أو للصحرا

وبيلقف أنفاسه الخضرا

عطشان

مربوط من قلبه في حاجة

عصيانة على التفسير

الشمس غفير مهووس

بتهد الروس

وتبخر روح الطين

والناس مساكين

مجانين

جانيين

هيجيبها منين ولا منين

على فين يا عزيز عيني

والسما مرشوقة عيون

وفي طلعة روحه لفوق

يتفك القلب من الترابيط

تناديله جميزة عجوزة

مغروزة في شط الغيط

موشومة في حيط البيت

زاينة المنظر وبهية

جميزته أهية

اللـــــــــه

الدنيا حياة

والاتجاهات موجودة ومش تخاريف

اتكاتروا عليكي ألف خريف

ما اصفرش لونك يوم

متموتش الشجرة المسقيّة

من عرق اليوم

ودموع اللي مقدروش

متموتش اللي جدورها

أساسات لبيوتنا

الا ان متنا

مع إن عينيه

كانت بتشيّع كل ماليه

في جنازة

مقدرش يشيّع ضلـِك

و”أصيل” رابض تحتيها

ماليها حكـَم وغرام

بيملّيها حكاوينا

قال لها عن أوجاع فينا

وكل ما بيزيدها

تورّق

يتوجع أكتر

تتزوق

تثبت

تبعت في الأرض رسايل

يالعود المايل عود

يالصوت الناشف حنْ

الزرعة ايه غير حلم

والتفسير بالموجود

يالعود المايل عود

يالصوت الناشف حنْ

يا عجوزة يا جميزة

يا أمان

يا صبية

يا وصل وحرمان

يا عزيزة

عطشان .. اسقيه

لو متاخد ردّيه

طرح الراحلين الساكن فيه

ميروحش بلاش

والأرض شجر ومعاش

متموتش اللي جدورها

أساسات لبيوتنا

إلا ان متنا

واحنا ممتناش

احنا ممتناش

عمر

12 يونيو 2005

9 Comments »

  1. Aladdin said,

    الحمد لله أنا أول واحد يجي هنا ويهني ويبارك على الونسة الجميلة بتاعت امبارح. ربنا يخليك لينا يابو عمر ويوسع عليك “الوسعات” ولا تنسى أن تقدم لنا عندما نأتي الى الجميزة “الفاكهة الطازجة” واخد بالك (ما تهربش وتقول لي دي غلطة مترجم ها؟!!!!!!)

  2. Omar said,

    لطفك مغرقني يا علاء، وجودك معانا تحت الجميزة كان مُسعد فعلاً، وإن كانت الجميزة افتراضية وفي مكان مكيف وعلى كراسي قطيفة وبما إن الموضوع كدة فعليك أن تقبل يا بوب بنظرية أن الفاكهة أيضاً افتراضية أو معنوية على شكل نغمات وحروف والذي منه، وبعدين الحجة ع الفراعين اللي كتبوا النص ده، لست أكثر من وسيط يا سيدي، وعموماً ليك عندي واحد كوكتيل معتبر عند أى واحد بتاع عصير يعجبك، ويدوم الود يا سيدي.

  3. ???? ???? said,

    ايه ده هو فيه عصير جميز؟! وأنا كمان يا عمر
    كانت جميلة أمسية امبارح يا عمر ومليانة ألوان.. غنيت معاكم وضحكت وتأثرت وغالبا عينيا بتدمع في كل مرة بشكل مختلف عن التانية..
    أما الجميزة بقى “القصيدة” فأنا كنت من أوائل -إن لم أكن أول- من قرأها وبمجرد ما انتهيت منها عليت صوتي في الحضور “سمع هس” اسمعوووني.. واعتليت المسرح وانطلقت معاها -مع
    الجميزة- لفوق زي فروعها ولتحت تحت تحت زي جذورها القوية.. ولما عمر سألني قرأتِ؟ قلت: “آآآه.. كنت فاكرة إني مت واتفاجأت إني عايشة
    وعايشة أوي على جوه وعلى بره وفي كل الأحوال” جو اهد يا عمر

  4. chaosgnosis said,

    Omar…..
    thank you my friend….

    ….

    not sure what else to say…..

    powerful and gentle at the same time …(just like your gemmeiza)

    This kind of poem can only be commented on, with deep-felt honesty, in true 3ameyya …it feels helplessly shallow to find appropriate words in English….

    kalam yewga3….

    Thank you again..

  5. chaosgnosis said,

    the drawing is fantastic too…do you know the source; temple, exact papyrus etc.??

  6. Omar said,

    كاوٍس: آسف إني قلت كلام يوجع، لكن عزائي إن الوجع أحياناً بيكون بالأهمية دي، شكراً على كلامك الرقيق.
    بخصوص الصورة، للأسف مش عارف هى موجودة فين بالظبط في مصر، لكن أنا لقيتها على الرابط ده: http://www.kinfonet.org/community/centres/sycamore/

    علاء: آمين، ويجعلنا من بركاتك يا لول

  7. Aladdin said,

    ايه يا عم عمر ده دانتا اتصيت يا معلم! الناس في لوس أنجلوس مش عارفين يشكروك ازاي ع القصيدة العجب اللي انت كتبتها دي. ربنا يديم عليك ربة الشعر “الحلوة” دي!!

  8. rana said,

    كلمات فعلا جميلة … بس انت عارف إن فيه مقولة قديمة بتقول ان كل اللي بيزرع شجرة جميز بيموت !!! وكانوا زمان لما بيسألوا واحد في الأرياف عن أبوه ويقول إنه مات مثلاً … كانوا بيستنتجوا انه لازم زرع شجرة جميز عشان كدا مات !!!! دام إبداعك

  9. Omar said,

    رنا/ أنا أول مرة أعرف المعلومة دي، معلومة طريفة فعلاً، وليها دلالات كتير موحية، يعني فيه إسقاط واضح على إن اللي بيزرع جميزة بيديها حياته نفسها، ومع ذلك بيزرعها.. ده رمز ابن لذينا، موضوع الجميز ده مكنتش اعرف انه واسع كدة..
    أشكرك ع المعلومة وعلى وجودك هنا، نورتيني يا رنا


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: