December 7, 2005

مِسْـك الليل

Posted in مفيش ف الأغاني كدة ومش كدة at 2:26 am by عمر مصطفى

عشان حبيتها من أول غنوة

سعاد ماسي نزلت ألبومها الجديد “مسك الليل”.. اللي لسة بانزله، لكن باقترح عليكم تسمعوا الجزء الصغير ده من غنوة “دنيا وزمان” عشان تعرفوا ليه البنوتة دي كان ضروري تغني، وليه كل بنوتة عارفة نفسها بتغني، لازم تغني بجد، الموضوع يستحق فعلاً

رابط: مقال قديم كنت كتبته عنها

December 3, 2005

أول الفراشات

Posted in ع العالي..سمّعني at 1:26 am by عمر مصطفى

 

امبارح بعد بروفة جميزة، سهرت مع العم ناصر النوبي كبير الجميزة، و“ميدو” الصوت اللي بيعجبني جداً شخصياً، ناصر استفزني كالعادة، وخللاني لحنت جزء من أغنية جديدة من قصيدة “كلام فاضي”، اللي هو بيقول: ط

 

خللينا نستفسر
عن أول الفراشات
عن أروق الينابيع
خللينا لما نبيع
مننتهيش فجأة
خللينا في الزنقة
نغازل الوسعات
وافتكري ليه في الفرْح
ابدعتي في البسمات
وافتكري ليه فعلا
قدرتي ترضيني
وانا كنت مش راضي

 

النتيجة كانت لطيفة، خصوصاً بعد تعليقات وملاحظات ناصر اللي كان بيشد في شعره بسبب عندي معاه فيها، وخللته يطلع كتاب الأبراج عشان يعرف يتعامل معايا ازاي !!!! وميدو كان أداؤه تحفة، ياريت الواحد كل ما يلحن حاجة، يلاقي صوت جميل زيه يسمعه شغله بجد..عموماً حابب اعرف رأيكم دام فضلكم

 

إهداء للعزيزة “جيرونيمو”

ملف الصوت: أول الفراشات