December 3, 2005

أول الفراشات

Posted in ع العالي..سمّعني at 1:26 am by عمر مصطفى

 

امبارح بعد بروفة جميزة، سهرت مع العم ناصر النوبي كبير الجميزة، و“ميدو” الصوت اللي بيعجبني جداً شخصياً، ناصر استفزني كالعادة، وخللاني لحنت جزء من أغنية جديدة من قصيدة “كلام فاضي”، اللي هو بيقول: ط

 

خللينا نستفسر
عن أول الفراشات
عن أروق الينابيع
خللينا لما نبيع
مننتهيش فجأة
خللينا في الزنقة
نغازل الوسعات
وافتكري ليه في الفرْح
ابدعتي في البسمات
وافتكري ليه فعلا
قدرتي ترضيني
وانا كنت مش راضي

 

النتيجة كانت لطيفة، خصوصاً بعد تعليقات وملاحظات ناصر اللي كان بيشد في شعره بسبب عندي معاه فيها، وخللته يطلع كتاب الأبراج عشان يعرف يتعامل معايا ازاي !!!! وميدو كان أداؤه تحفة، ياريت الواحد كل ما يلحن حاجة، يلاقي صوت جميل زيه يسمعه شغله بجد..عموماً حابب اعرف رأيكم دام فضلكم

 

إهداء للعزيزة “جيرونيمو”

ملف الصوت: أول الفراشات

11 Comments »

  1. عمر أنا ماكنتش قريت القصيدة ..هايــــــــــــلة من أجمل الحاجات اللى قريتهالك…اللحن كمان وصل إحساس الكلام، كملها من غير كروتة…عبقرية

  2. Ghada said,

    ماذا أقول بعد كل ما قيل..
    شكلكم كنتم في حالة “دوزنة” عالية قوي يا عمر..
    (مش هي اسمها كده برضه)

    جميلة فعلا.. و”ميدو” حاسس الكلام بشكل مثير للحسد والحقد والغل و.. كفاية كده!

    هاقول لك زي ما باقول لك دايما..
    روح ربنا ما يضيق لك وسعات يابني
    :))

  3. Omar said,

    واحد من مصر: ربنا يكفينا شر الكروتة، ربنا يخلليك

    أحمد: انا اللي شكراً قوي

    غادة: تسلمي يا “غادة”، اسمك لوحده مديح، خصوصاً لما يبقى اسم على مسمى، ويسمع من بقك ربنا

  4. hesterua said,

    الله
    الكلام و اللحن روعة يا عمر
    والصوت جميل جدا وواصل قوى

  5. خجل said,

    خير ..خير

  6. Doaa Samir said,

    هايلة،،إنت عارف رأيي يا عمر
    بس ياريت لو تكملوها كلها،
    وباخبي..
    وانا عريان
    وجعي عن الأحزان
    وباداري وانا دفيان
    فرحي البسيط بيكي
    غجرية في عنيكي
    بترقص اسباني
    وبتنشر المناديل
    يكفي العياط بالليل
    زارعين سُكات أشطر.. إلخ

    وياسلااااام لو أبدعتوا في جملة “زراعين سكات أشطر”.. بديعة أوي، ومؤلمة أوي، وحقيقية أوي “زارعين سكات”.. أصل فكرة السكوت والصمت عمالة تصرخ جوايا مع إنها ساكتة… إحم.. عجبي

  7. Geronimo said,

    خليني
    اخرج م السكات
    وانطق بكا
    وذكريات
    خليني استفسر
    عن قوة ف كلامك
    ف اللحن والنغمات
    ف الروح وإحساسها
    خليني اتساءل …

    خليني لما ابيع
    واكون خلاص بضيع
    ابتدي تاني
    وارجع لأحلامي
    واعيش براح اكبر
    وارقص لأحزاني
    واطلعلها لساني
    خليني اشكرك ولو اني مش هقدر اشكرك
    فعلا قدرت ترضيني وانا كنت مش راضية
    مزيكتك تجنن
    وميدو صوته دافي قوى مع ان الليلةدي برد
    والكلمات عاملة زي البوسة السخنة قوى او رغيف العيش الطازة
    مش لاقية لها اي وصف غير كده

    مش هشكرك
    اصله واجب عليك
    مش احنا صحاب صحاب
    بكرة هتعرف انت اديت لي ايه ؟؟؟!!
    أصله هيبان عليا

  8. سامية said,

    جميلة وبسيطة وواضح انه بيقولها وهو حاسس بالكلام جدا

  9. Omar said,

    دعاء: مش معنى اننا بنسكت انه مش قادرين نتكلم، ونصرخ كمان، قوللي اللي ف نفسك، ولا يهمك

    خجل: ماشي الحال🙂

    جيرونيمو: اهو ده بقى رد السلام بأحسن منه، انتي تستاهلي كل خير، خلليكي كويسة على طول، واصحاب على طول طبعاً

    سامية: شكراً للدعم الجميل الدائم ده يا ست الكل، كويس انها عجبتك، هاكملها وتقوليلي رأيك بقى

  10. سامية said,

    كملها وسمعهالنا في حفلة🙂

  11. Omar said,

    إن شاء الله، دبستي نفسك كدة، لو مجيتيش مش هنقولها :-)–>


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: