June 8, 2006

حفل المدونين الأولاني.. حصل خير إن شاء الله

Posted in حياتي at 4:22 am by عمر مصطفى

ما توقعته وما جعلني متخوفاً من المشاركة في البداية حدث ويحدث وسيحدث، ولا تسألوني ما الذي حدث، فالذي حدث قد حدث، ولكن عموماً الحفل أو الامسية أو الليلة أو المناسبة أو أيا كانت، كانت إعلاناً وإشهاراً جيدين لوجود حركة التدوين وفاعليتها في مجتمعنا، رغم حالة القولبة التي نوضع بداخلها قسراً وظلماً وبهتاناً كمجتمع مدونين، بدءاً من فيلم الجزيرة إلى الحفل نفسه، والميديا نفسها مش مخلصة لفكر ولا لحد، الميديا بتستهلك وتكاكي. مع كامل احترامي بالطبع للاتجاه الذي روّج له الحفل، فالسياسة صوتها عالي وده عادي وطبيعي وأبدي، وبغض النظر برضه عن النشيد العجيب اللي كان مع العرض المسجل في البداية، والموضوع كان فاضل عليه شوية هتافات عشان يبقى مظاهرة مثاليةفرقة “حالة” كانوا حالة عالية بالفعل، معجب جداً بصياغتهم لأفكارهم ولحرفيتهم العالية في الأداء، وباعتذر لأعضاء “جميزة” عن اللي انا دبستهم ودبست نفسي فيه، وباعتذر بشدة للشاعر والإنسان المهذب “رامي يحيي” عن شوية العبث دول، لكن فعلاً اكتر حاجة بقيت مقتنع بيها أكتر من أي وقت تاني، إني ماحبش أشارك ولا أكون جزء من (نشاط منظم) لمدونين على الأرض ولا مقتنع بتعاونهم كمدونين إلا في بيئتهم الطبيعية الافتراضية، اللهم إلا الصداقات والعلاقات الشخصية التي أعدها بحق إضافة لي شخصياً، لكن قصة التنظيمات والمشاركات والتبرعات دي طلعت ميجيش منها في رأيي وتكفيني

التجربة دي، مع خالص احترامي لكل اللي فكر وساهم وشارك في الموضوع ده وشديد إيماني بحسن نواياهم وتشرفي إني قابلتهم وعرفتهم، وحصل خير إن شاء الله

27 Comments »

  1. مم.. معرفش ليه لما قلت نفس الكلام للناس اللى سألونى ان كنت حاروح الحفلة ولا لاء.. اتهمونى بحاجات كتير .. ممكن اقول دلوقتى ان أغربها كان انى غريبة😀

    لما قرأت كلامك عرفت انى بفكرى اللى قلت بيه لاء.. عاقلة… ودع اللى قال انى غريبة يقول براحة راحته

    وربنا يوفقك مع الجميزة ان شاء الله

  2. Anonymous said,

    هي الحياة كانت كابوس كده..؟

  3. يحي said,


    خليني انا كمان أقولك ان اللي توقعته قد حدث…ومش المقصود هنا الحفلة أطلاقا
    بس صدقني انا هحاول اعلق هنا بشكل منطقي جدا ومهذب جدا
    وتعالي نبدء من البداية
    ” ولا تسألوني ما الذي حدث، فالذي حدث قد حدث”
    انا شخصيا لا علم لي بما تتحدث عنه هنا..وكان من الواجب انك تكتب ايه بالظبط اللي حدث ده علي سبيل الأمانة مش اكتر علشان متسبهاش عايمة كده ده, وتدفع الناس انها تخمن
    هو ايه اللي حدث يا عمر بالظبط!؟
    بتكلم عن أستهلاك الميديا للمدونين رغم كونك واحد من ضمن اللي وافقوا واستفادوا منها..جايز اكون انا شخصيا استغليت ده للترويج للحفل ,بس ده جزء من التنظيم ومفتكرش ان في شخص بيفهم ممكن يأخذني عليه ..وانت بنفسك شاهد علي كمية التغطية الاعلامية اللي اتوفرت للحفلة ديه وبشغل فردي تماما..لدرجة ان الجزيرة عملت لها نقل مباشر,تباعا لشهادة الشهود..وكان في اكتر من سبع قنوات فضائية…وكامرتين للتلفزيون المصري
    تخيل يا عمر ..التلفزيون المصري
    يعني الغلابة والفقراء الي كنا عايزنهم يغنوا ومقدروش يحضروا للحفلة ممكن جدا في غفلة من مسئولي ماسبيروا يشفوها علي التلفزيون
    “حاجة بقيت مقتنع بيها أكتر من أي وقت تاني، إني ماحبش أشارك ولا أكون جزء من (نشاط منظم) لمدونين على الأرض ولا مقتنع بتعاونهم كمدونين إلا في بيئتهم الطبيعية الافتراضية”
    رجعنا تاني لفكرة الأحكام المطلقة -واللي بكرها بشكل شخصي جدا- يا اكثر مني أدمية رأيك لا يتجاوز الرأي الشخصي وغير ملزم لأحد غيرك..كما ان المدونيين غير محصورين في خمس او سبعة اسماء جائتهم الجرأة لأرتكاب حماقة المبادرة
    أيا كان
    ثقتي غير منتهية في كون كلامي غير مفهوم ليك وانه هيستفزك رغم اني بكلم بمنتهي الموضوعية البحتة
    لكني خليني اعترفلك …انك مكنتش واحد من المنظمين يا عمر..وان دورك معانا مكنش اكتر من دور اللي جاي يقدم فقرة ويمشي..وأن دور محمد عبد الفتاح(فرقة حالة) وأشرف وجدي(فرقة ضي) كان اكبر وانا شخصيا شاكر ليهم وشايله جميلهم بشكل شخصي
    الناس دية عملوا بروفات واتبرعوا بوقت في التنظيم والدعوة والاعلان للحفل وصل الامر انهم خدوا ملصقات الحفلة ونزلوا يلزقوها في الشارع بأديهم..مش سقطوا علي ببراشوط يوم الحفل ودربكو لي الحياة
    المنظمين الحققين يا عمر هم اللي قعدوا فوق الأسبوعين وبشكل شبه يومي ومستمر يتقابلوا و يفكروا في كل تفصيلة
    وصل الامر اني وأيوب منمناش لمدة تلات ايام قبل بدء الحفلة..لكن علي الاقل انت كنت بتشوف شغلك..وبتكلم علي الماسينجر..وواخد دوش ومسرح شعرك
    فبلاش نتكلم عن العمل الجماعي للمدونين وحتمية قولبتهم في جماعة أفتراضية لأن السهم فعلا خلاص خرج من الجعبة وأنطلق
    ده غير ان المنظمين وبشكل برجماتي فعلا هم زي ما البعض سماهم ألجنود المجهولة لكن انت كنت نجم الحفلة الوحيد ن المدونيين المنظمين..واكتر حد استفاد منها مهنيا..ولو مش مصدق اقرا تقرير “رويترز عن الحفلة مش هتلاقي اسمي شخصيا فيه
    وباعتذر لأعضاء “جميزة” عن اللي انا دبستهم ودبست نفسي فيه، وباعتذر بشدة للشاعر والإنسان المهذب “رامي يحيي” عن شوية العبث دول،”
    ممكن اتفهم أعتذارك لجميزة ولرامي علي انه حماية لمصلحتك وعلاقاتك الانسانية بيهم لكن طبعا رافض تماما كونك تظهرني في شكل الجلاد الوحيد.. كنت اتمني انك تتفهم موقفي مش علي انه موقف شخصي من الناس ديه لأن مفيش اي عداء بيني وبينهم..مكنش اكتر من موقف مهني..أنا كنت المسئول الاول عن الحفلة ديه وكون فشل اي تفصيلة فيها معناه شنقي علي صفحات المدونين..ولو مش مصدق اقراء تدوينة ابليس وجاوب ليه “يحي مجاهد”مش حد تاني
    http://shadow.manalaa.net/node/413#comment

    فمتجيش تفاجئني يوم الحفل بأنك عايز تشارك بفقرة وكمان تفرض علي فقرة تانية لرامي يحي وتتوقع مني اني أوافق..لأن لا “جميزة “كانت علي برنامجي الفني ولا “رامي”…واللي مش مصدق يرجع لصفحة الأعداد للحفل
    علاقتي برامي يحي تتجاوز العلاقة المهنية ..لأننا كنا اصدقاء لأكتر من خمس سنين وبنا مواقف انسانية كتير مشتركة..وكنت اول واحد يقول رأيه في النسخة التجريبية لديوانه الأول “نصوص”فرط”قبل ما يقرر انه يبقي شاعر ويبطل تمثيل ومسرح وكتابة القصة القصيرة وتأجير عجل وطحن سمسم
    الفضل الوحيد لكونك مشارك بالحفلة يرجع لمريم لأنها الوحيدة اللي طلبت ده وبشكل شخصي جدا..انا مسمعتش جميزة ولا حضرت لها بروفة وبالتالي مكنتش اعرفهم اطلاقا
    ود مش معناه انهم فريق مش قوي ..او كونك مش موهوب..بالعكس مشاركتهم اعجبت الناس جدا وعملت اسراء للحفل..وخصوصا اغنية كرسي تيفال
    وده واضح جدا أنا هنيتك بشكل شخصي بعد نهاية الحفلة وبمجرد ما في حد طلب انه يعمل معاكم حوار صحفي خدت غادة من أيديها وعرفتهم ببعض..لأن ده من أهداف الحفلة طرح اسماء جديدة سواء فنية او ثقافية للجمهور..اللي افتكر انه تجاوز كل توقعاتي
    أعتذارك لرامي يحي ولجميزة يخليني افكرك انك كده مدين لي بأعتذار شخصي مرتين,ورغم كل اللي أتقال وهيتقال خليني اكد علي حاجة وهو أني “بسجل أحترامي ليك ولأعضاء الجميزةوللشاعر المهذب “رامي يحي”..
    وكل الدببة بالاقطاب ..والحيتان بالمحيطات..واليرقات فوق أوراق الشجر

    واتمني انك تتفهم تعليقي صح ومتمسحوش علشان اللي يدخل يقرا يشوف وجهتين النظر
    بعض من ما كتب عن الحفل
    (هكذا أنا –رضوي)-حفلتنا الأولي
    http://hakazaana.blogspot.com/2006/06/blog-post_08.html
    (تخاريف-تخا تخا)-تغطية كاملة لحفل المدونين الأول
    http://t5at5a.blogspot.com/2006/06/blog-post_08.html
    (تغطية الوعي المصري-وائل عباس)-حفلة المدونين الأولي

    http://misrdigital.blogspirit.com/archive/2006/06/08/%D8%AD%D9%81%D9%84%D8%A9-%D8%A7%D9%84%D9%85%D8%AF%D9%88%D9%86%D9%8A%D9%86.html

    تقرير (رويترز)
    http://ara.today.reuters.com/news/newsArticle.aspx?type=entertainmentNews&storyID=2006-06-08T153948Z_01_OLR854810_RTRIDST_0_OEGEN-EG-BLOGGERS-PARTY-MA6.XML

  4. مبدئيا أحب اهنيك و اشكرك علي الفقرة اللطيفة بتاعتك .. كانت جميلة و فرقة الجميزة بجد جميلة..
    اما عن موضوع رامي ..فانا بجد اتضايقت منه بشكل شخصي .. لاني كنت أول واحد رامي يقوله و يساله عن الموضوع ده ..ورامي صاحبي و حد بحترمه أوي فما كنتش عارف أقوله ايه لحد انت ما ظهرت .. اما عن الكلام اللي انت كتبته ..فاسمحلي اني اسجل اعتراضي عليه .. أولا لان الحفل كان ناجح جدا ..ثانيا لان الناس تعبت فيه بجد خصوصا يحي و رامي أيوب .. وده أظهر اننا مش بنمثل في مدوناتنا وقدرنا نعمل حاجة بجد جميلة .. فشكرا ليحي و ايوب و زينب و شيماء و كل الناس اللي شاركونا و اللي حضروا .. وياريت تفكر في الي انت قلته … ااه صحيح احب اعرفك بنفس .. أنا برضه إسمي عمر مصطفي .ههههه ..

  5. عمر تجربة
    علاء الدين

    انا واحد كنت قاعد في مقاعد المتفرجين و ما كنتش في الكواليس
    لذا لو فيه حاجات مش عارفينها يا ريت توضحوها

    انما من الواضح ليا

    دي حفلة تضامن مع أصدقائنا المعتقلين
    علشان نفكر الدنيا بيهم و ده ممكن يساعد انهم ما يتنسوش جوه
    دي مش سياسة
    و جمع تبرعات ليهم
    يعني بطاطين و اكل و ادوية و كتاب وغيره
    دي مش سياسة
    فيلم الجزيرة موضوع وثائقي و كل واحد كان في الفيلم له اتجاهه او ما لوش

    مش عارف السياسة دي كانت فين بالضبط
    حالة و ضي و جميزة غنوا اعمالهم
    حد فرض حاجة عليهم
    غنوا نضالي و الباقي لا

    هي كانت فين السياسة و الاكتيفيستس

    و بعدين السياسة دي مش جزيرة عليها سياسيين

    اهتمام اكبر عدد من الناس بالشان العام باشكال مختلفة اكيد هايخلي عيشتنا احسن

    النخبة المثقفة المفروض يكون اهتمامها اكبر
    كل واحد بطريقته
    مافيش فن و لا دين و لا كتابة و لا اي حاجة منفصلة عن السياسة بشكل حاد|

    احترم طبعا الفنان اللي ما يبحش يكون بوق لاتجاه او هيئة
    جميل
    بس هو كان فيه حزب كا فيه هيئة
    هو كان فيه ايه ؟

    اللي شفته اننا سلمنا علي بعض
    ناس غنت و ناس انبسطت
    جمعنا تبرعات
    الاعلام اهتم
    ناس اهتمت بالتدوين و سالت عنه

    بس
    ايه المشكلة ؟

    لو فيه مشاكل تنظيمية و تضارب مواعيد او اختلاف عن فقرات او مشاكل في الادارة
    عادي

    بس انا بجد نفسي افهم هو فيه مشكلة كبيرة و ما حدش عاوز يقولها و لا ايه ؟

  6. صلوا ع النبي يا جماعة

    علي كل حال انا سعدت بمقابلتك يا عمر
    و سعدت بسماع الحانك و غنا غادة و نورا
    و حبيت ناصر النوبي و مجدي النوبي و اللي غني كرسي تيفال و للاسف نسيت اسمه
    رغم اني باحبه جدا لما بيغني لشكوكو مع الورشة

    لو كنت رفعت اغنية ارمي حمولك علي مولاك
    يبقي جميل

    عجبتني جدا

    دايما نتجمع في تجارب ان شاء الله
    و صلوا ع النبي كمان مرة

  7. أحمد said,

    يا يحيي

    يحيي المقصود في التدوينة ليس انت ؟؟
    لان ببساطة انت اسمك هانى

    لكن انا بلعب على تيمة الاسماء دى كتير جدا

    مرسى و احمد و يحيي

    و يحيي هو شخصية محسن محى الدين في فيلم اسكندرية ليه
    و الجملة عنوان التدوينة هى تحوير لجملة المليجى الشهيرة

    يا يحيي قول لامك الدنيا مش شربات نيلون

  8. يحي said,

    وعليه أفضل الصلاة والسلام
    طبعا انت جاي تهدي النفوس يا عمرو

  9. Omar said,

    عزيزي يحيى

    مفيش حاجة تخلليني أشيل تعليق من عندي غير لما حد يقل أدبه، وانت راجل محترم جداً ومؤدب جداً، وتعليقك هارد عليه بس عشان انت اهتميت وتعبت وكتبته:

    – شكراً على (محاولتك) التعليق هنا بشكل منطقي جداً ومهذب جداً، ولو ان ده المفترض يعني، معرفش ليه (هحاول) دي

    – مفيش واجب عليّ إني أوضح ايه اللي حصل وايه اللي محصلش، انا باكتب اللي يعجبني وعليك انك تاخد منه الموقف اللي يعجبك، كفاية واجبات الله يخليك
    – أنا مش عارف ليه كل منطق كلامك اني بادينك بشكل شخصي، يا أخي أنا معملتش ده ومش محتاج أعمله، بالعكس أنا محترم جداً المجهود اللي انت عملته انت وكل الشباب، وباعتبر اني كسبت اصحاب جداد انت أولهم، أنا واخد موقف من منطلق الحفلة وأساس الفكرة من بعد ما خضت التجربة، وافتكر ده من حقي اللي ميلغيهوش نجاحها إعلامياً من عدمه، دي قصة تانية خالص.

    – ” يا اكثر مني أدمية رأيك لا يتجاوز الرأي الشخصي وغير ملزم لأحد غيرك”.. هو انا قلت غير كدة؟! طبعاً رأيي شخصي وغير ملزم لأي بني آدم

    – أنا لم أدع إطلاقاً إني كنت من المنظمين، ولا اتمحكت في ده، ولا طلبت أصلاً إني أشارك، أنا اتطلب مني المساعدة ووافقت وانت كمنظم لم تعترض، مفيش جمايل يعني.. صحيح؟ كذلك لم أقارن بين مجهودي وبين مجهود آخرين سواء الفرق التانية أو المنظمين، وكونك شايل لهم جميل شخصي وشايف إني وفرقتي مع العكس كنا شيء مربك ونازلين ببراشوط ده شيء يخصك، مع إنه والله كلام أأنف إني أرد عليه، ويمكن مريم هي اللي تقدر تتكلم في ده، كل اللي اقدر اقوله إني موعدتش بحاجة ورجعت فيها أو عملت أقل منها، وأنا باخد دوش واسرح شعري بغض النظر عن أي ظروف، دي مسألة مبدأ

    – أنا مجيتش عشان يقال إني نجم لا سمح الله، الحمد لله الواحد عنده مساحات بديلة كتير بيقول فيها هو مين كويس، أنا كنت جاي أضيف بالأساس وأعتقد إني عملت ده

    – أنا لا شنقتك ولا ادعيت انك الجلاد الوحيد ولا غيره، ولا طرحت مسألة معاييرك المهنية في أي مساحة ولا ناوي أعمل ده، يابني أنا أدنتك امتى ولا فين مش عارف؟!

    – أنا باعتذر لرامي ولجميزة على مواقف انا أخدتها مش انت اخدتها، انت برة الموضوع أصلاً، وعليه ماعتقدش اني مدينلك بأي اعتذار، كنت مدين لك بس اني اوضح لك الأمور وده حصل، وصباح التجلي صباح الروايح يا جميل

  10. Omar said,

    شباب/ شكراً ع التعليق، كلامكم على راسي من فوق

  11. ما علينا

    ما تاخدنيش في دوكة يا عم عمر

    أغنية ارمي حمولك

    هاترفعها لنا امتي ؟

  12. Omar said,

    فوراً يا عمرو، طلباتك اوامر🙂

  13. pepa said,

    السلام عليكم ورحمة الله وبركاته
    عليه الصلاة والسلام

    والله يا عمر يا خويا انا رأيى كنت تعتذر للناس دول بينك وبينهم
    لما احب اقرا عن الحفلة عايزة اسمع كل حاجة كويسة

    مش عايزةاعرف الكواليس
    يحيى اكييييييييييد انت تعبت جدا.. حماك الله

    ومعلش.. نا كنت من الناس اللى نزلوا بالباراشوت على حضرتك والناس اللى تعبت م الاول.. بس والله نا كان قصدى خير

    وفى الاخر عمر .. شاطر انت كنت كويس جدا
    وافرحوا بقى يا مدونين!

  14. Aladdin said,

    لم آت للحفل لتوقعي ما “حدث” وقد صدق حدسي! الغريب انك وافقت يا عمر من البداية وكان لازم تتوقع برده ما حدث! أرجو ان تستفيد من “التجربة” ولا تتحول مدونتك في يوم من الايام الى “منصة” اكتيفيست!!

  15. يحي said,

    والله يا عمر انت راجل زي العسل
    ((صباح الفل
    والله الموضوع لهو تحميل جمايل ولا وأجبات..الحكاية كلها اني كنت عايز أوضح ان فيه ناس تعب كتير في الموضوع ده …وأن كان حصل أن في ظلم وقع ..فأكيد ده مكنش مقصود ..او متعمد..أفتكر أن الموضوع م أخره زي ما انت سميته تجربة بالنسبة للكل..يعني كلنا كنا بلعب مع بعض..والمفروض اننا كنا مستمتعين بالعبة ديه, يعني (عيل صغير عمل صوابعه كده هوه مسدس وقال لصحبة طريخ ,طراخ)
    انت عملت فيها فنان حساس..وراجل نظيف بسرح شعره ويغسل وشه عشان ده مبدء..وإحنا عملنا فيها منظمين وعملنا حفلة
    الموضوع ابسط من كده شادر وأتفض .وإحنا هيسنا..والناس ضحكة وروحت مبسوطة..والقنوات عبت شرايط..وعملت ساعتين ممكن تبيع علي حسهم نص ساعة أعلانات..أنا مسمعتش جميزة والله ياعمر..أعتبره تقصير مني,لكن فعلا لو في أغاني ينفع تترفع علي النت فياريت بجد نسمعهم..
    وبالمناسبة السعيدة ديه أحب أقولك ان الموضوع مفهوش اي روايح
    مساء ألتجارب))

  16. يحي said,

    أبليس ناجي..أحمد ..أوديسيوس
    ألمهم
    بطل تمثيل ياض😀

  17. أيوه كده
    فكوا القعدة

    أحسن و حياة شكوكو
    أقفل المدونة و اسيبكو و اتفرغ للنضال

  18. karakib said,

    يا ريت تتكرر تاني و مش وسط الامتحانات !!! علشان اعرف اجي يا جدعان دي ميعاجها كان بايخ اوي يعني !!
    انتوك

  19. يا جماعة الخير
    متنسوش ان دي اول حفلة او أول تجربة، واكيد اول حاجة دايما بتبقى مليانة عيوب ومشاكل
    يعني نعذر بعض
    انا عن نفسي استمتعت بالحفلة كتير جدا، رغم اني كنت حاسس اني غريب لأني معرفش ناس كتير، اي نعم عارفهم بالشكل والاسم، لكن معرفهمش شخصيا
    لكن رغم كده استمتعت بالحفل وشايف انها ناجحة بالنسبة لأنها اول مرة، والحضور كان على غير المتوقع
    يعني حاولوا تبصوا للنص المليان ونستفيد من اللي فات عشان التجارب الجاية، رغم ان شكلكم كده بيقول انكم مش مستعدين لتجارب تانية😀

    عجبني جدا أداء فرقة حالة وفرقة جميزة اكثر من رائعة، وعمر بيلعب ع العود حلو اوي ما شاء الله
    فرقة ضي معجبتنيش خالص وادائهم متواضع من وجهة نظري

    بالمناسبة يا عمر…انا اللي جيت سألتك على العود وعن مكان لتعلم العود بسعر مناسب، بس انت كنت مستعجل

    انا عندي عود شاريه من 3 سنين، واتعلمت العزف عليه مع نفسي وواحد صاحبي علمني شوية حاجات، بس محتاج اتمرن بشكل مستمر وفي مكان متخصص، ويكون سعره حنين
    اسف لتكرار السؤال بس لا مؤاخذة بقى انت رديت عليا في نص كلمة..لو تقدر تديني رد وافي هنا يبقى كتر خيرك يا جميل

    والعبوا مع بعض متتخانقوش

  20. Doaa Samir said,

    مش كنت أتخيل إنه في يومين توصل التعليقات للعدد ده، هابقى أفضالهم بعدين.. المهم،

    أنا مش هعلق على الحفلة لأني كتبت عنها في بلوجي.. وبالنسبة للتنظيم خصوصاً عدم التنويه عن فقرات الحفل حتى يستمر الحضور ومش يقوموا بعد فرقة “حالة” ظناً منهم إن الحفلة انتهت، فأنا مش مركزة عليها وعلى غيرها لأنه غالباً كل أول مرة من شيء ما يكون فيها هفوات بطبيعة الحال..

    بس أنا ليّ رأي مختلف يا عمر بخصوص إن تعاون المدونين غير مقنع إلا في نطاق بيئتهم الطبيعية -الافتراضية-.. أنا مش معاك هنا، لاتزال البيئة الافتراضية مقتصرة ومحددة بين فئة المدونين.. وأنا أعتقد إن البيئة دي لم تكن إلا لجوء مؤقت من حال الحياة على أرض الواقع ومسيرها ترجع له كما بدأ أن يحدث بس بصورة أقوى

    وأنا هنا مش باهمش من دور النت والحياة الافتراضية عليه، لأ أبداً، لكن مهما عملنا وتطورنا سيظل دوره مقتصر زي ما قلت قبل كده.. وأنا شايفة إنه اقتصار نشاط الناس فيه على بيئتهم الافتراضية أمر مش مقنع وفيه تحجيم لفرص ليهم أكبر في الواقع وأنا هنا أشير إلى قدرة بعضهم ورغبة الآخرين في التغيير على أي مستوى سواء سياسي أو غيره

    أما عن استهلاك الميديا للمدونين، فأنا مش شايفة إنها استهلكتهم.. اللي حصل إن التدوين بدأ يفرض نفسه على الساحة غير الافتراضية وبدأ يبقى له دور يؤدي لاعتقال بعضهم.. يعني ده هيرجعني للكلام اللي قلته إن كده كده الوجود الافتراضي للمدونين خد شكل تاني.. وده في حد ذاته مبشر

    على أي حال، أنا فرحانة جداً بالتجربة لأنها أكتر من كونها “تجربة” وباتمنى إنها تتكرر تاني

  21. م said,

    بدون محاولة لتهدئة نفوس أو كلام من دا، الحفلة كانت حلوة وعالية ومفيهاش أي تمثيل أو ادعاء. جميزة بالذات كانوا أحسن من أي مرة شفتها فيهم (يمكن أحسن بالنسبة لي). الكلام عن لا سياسة في التدوين ولا تدوين في السياسة مالوش أساس، التدوين صعد أصلا مع السياسة. الغلطة هنا ف استخدام لافتة “المدونين المصريين”. ممكن حل دا بعمل حلقة خاصة من المدونين لها اسم محدد (مدونون من أجل التغيير مثلا)، تتم النشاطات اللي زي دي ع الأرض باسمها. أنا مش بصدد تقييم للحفلة دلوقت، لكن من بعد الوثائقي وطالع كل شيء كان جميل وصادق وثوري ومرحرح، يعني عكس رسمي.

  22. تسلم يا سيدي

  23. Omar said,

    طيب قشطة جداً

    محمد محرز: زي ما قلت لك كلية التربية الموسيقية في الزمالك بتعمل دورات صيفية للمبتدئين بأسعار رمزية، اعتقد عندك وقت كفاية عشان تقدم، بالتوفيق

  24. Mr.GEMYHOoOD said,

    بغض النظر عن مشاكل او مش مشاكل المفروض ان اى حاجة تحترم سواء بقة كنا مع او ضد يعنى ما اشوفش تدوينات نازلة شتيمة فى الحفلة لو فرد اتكلم باسمنا انا مش شايف فيها عيب و لا هوه كدة سرق الاضواء لان فى ناس زعلانة من يحيى قوى طيب لما انت زعلان كنت هز طولك و انزل نظم انت

    و مالهاش لازمة ان كل الكلام يطلع لان اتقال فى النهايه اننا زى كل الشباب عملوا حاجة و فى الاخر بيتخانقوا و بيتعاركوا على التورتة زى مصر كلها

    للاسف احبطونى

  25. Omar said,

    معلش يا جيمي، آسف ع الإحباط يا حبيبي، روّق كدة، مفيش حاجة تستاهل

  26. Mr.GEMYHOoOD said,

    لا عادى يا عمرو ربنا يعلم انا بحترمك قد ايه و فعلا معجب بفنك بس فعلا حاجة تزعلنى ان كل يوم شتيمة فى المدونين على الجرايد و كل المونين مرة واحدة اتقلبوا على بعض و المدونات بقت كلها هجوم و شتايم يحى واخد شتيمة ربنا يعينه الصراحة و ما كانش ليه لزمة كل دة بصراحة

  27. emurhfkq said,

    people are stranger


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: