September 14, 2006

المدينة الصبح بدري

Posted in موزونٌ مُقـــفـّى, تصاوير at 2:25 pm by عمر مصطفى

 

المدينة الصبح بدري

الشوارع لسّة فاتحة

والمدارس لسّة فاتحة

المحلات..

والحواري

والمجارى

بلكوناتها.. بواباتها

والعيون لسّاها فاتحة

في المدينة الصبح بدري

 

في المدينة الصبح بدري

العجل ساير وداير

والسجاير..

مالية قلب الميكروباص

والكتب فوق رجل فاطمة

والعينين مليانة ناس

والحناجر لسة عتمة

والإيدين..

بتجس نبض الأمنيات

في المدينة الصبح بدري

 

في المدينة الصبح بدري

تسبق الرجلين طريقها

والشوارع مش ملاحقة

مــش مـوافــقــة..

والطريق مع إنه واضح

هاجس المجهول مقاوح

واللي جاى مع اللي رايح

كـلــه ســايــح..

فى المدينة الصبح بدرى

 

في المدينة الصبح بدري

العصافير من كرمها

لسه بتزقزق وتسرح

رغم دخان المصانع

والعوادم والتراب

رغم تلاجة مشاعر

طالعة من ورا ألف باب

إنهيار ساقع وهادى

لحكايات عمالة تجرى

واغتيال الصبح عادى

في المدينة الصبح بدري

أنا

زمان زي اليومين دول

7 Comments »

  1. عوليس said,

    الله عليك ياعم عمر

  2. Aladdin said,

    كويس يا عمر أنه رغم دخان السجاير في الميكروباص والعوادم والتراب لسه العصافير قادرة تزقزق!!

    أرفع لك القبعة – كعادتي – سيدي!

  3. radwaosama said,

    حلوه يا عمر قوي

  4. tagreba said,

    🙂

  5. samia said,

    أهه إنت اللي “يا عيني”.. أنا قاعدة بامزمز في البلوج الجديد كده على راحتي عشان لو كان فيه حاجة قبل كده فاتتني كده ولا كده🙂 بس القصيدة دي ما قدرتش اعدي من غير ما أمسي عليها
    :)))

  6. tagreba said,

    مساء الفل يا ستي🙂

  7. wafaa said,

    يا نهار احساس
    ايه ده
    انت اكيد منالى بيتبهدلوا كل يوم الصبح زيى بس لسه بتشوف حاجات جميلة
    مش عارفة
    طيب متحاول تلحنها
    دى تحفة
    عاملة زى اغانى منير الى بتكتبها كوثر مصطفى ياعنى شوية كدة فيها روح ساح يا بداح
    بجد تجنن احساسك فوق العالى
    احييك
    وفاء


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: