December 31, 2006

لا تشبُكيني والنبي

Posted in موزونٌ مُقـــفـّى at 4:06 am by عمر مصطفى

نداء إلى أصحاب القلوب الرحيمة ومحبي البسطرمة بالبيض

 

لا تشبُكيني والنبي

فإنّ لي قلبٌ صَبي

يحلو له مرحُ الغرامِ

لكنه.. مُــتـقـلـبِ

لا تشبُكيني والنبي

 

لا تشبُكيني في الهوى

اخضرّ قلـبي فاستوى

ولا من زرع ولا من روى

غير عطشي وانتي بتشربي

لا تشبُـكيني والنبي

 

لا تحرمي صمتي السكونَ

وتـُجهدي فيّ الظنونَ

فقد يكونُ العلمُ مُـشــْقِ

والعشقُ علمٌ غـَيـــهبي

لا تشبُكيني والــــنبي

 

ولا انتي لما..

وانا لما كنتي

تنفض لمّة..تطرح جنينتي

تلمي انتي كلامي كله

يتلموا تاني وتهربي

لا تشبُكيني والنبي

 

ليست بيوتٌ بل هيَ

مترادفاتٌ مُلهية

ياللي انتي هيّ ومش هيَ

أي الضمائرَ ترغبي

لا تشبُكيني والنبي

 

(لا) تنفي والثابت مفيش

جزمي بـ (لمْ) مهمّنيش

وباعيش في دواراية سكون

فيا تسكني.. يا تغرّبي

لا تشبُكيني والنبي

 

31  ديسمبر 2006

December 28, 2006

لون المشمش المدهش وتكنولوجيا البقع

Posted in موزونٌ مُقـــفـّى at 2:27 am by عمر مصطفى

يمكن لإنه مكانش فيه

أنا تهت فيه

وبقيت في غاية لاندهاش

ولا لون ثبت

ولا قلب باش

ولا حب كان يغسل أكثر بياضاً

أو خضاراً أو صفاراً

أو لون مشمشي هادي

هتلاقي بقعة لطيفة

عادي

بقع الحياة ماكياج

 

يا صوف الأضرحة المبلول

غَسول عنيّا لونه اخضر سندسي

داريني وانا بابكي يا عيني واحرسي

خللي اللي شافوا يقولوا

ما شوفناش

بعد العياط

ألعب في حوش الانبساط

والراحة

واشوف كويس قوي

كأي عيّل ع المعاش

وابقى في غاية لاندهاش

 

28 ديسمبر 2006

December 26, 2006

اسكندريللا يا أجدع ناس

Posted in مفيش ف الأغاني كدة ومش كدة at 5:07 pm by عمر مصطفى

هز الهلال – فريق اسكندريللا

الأربعاء 27 ديسمبر – ساقية الصاوي 8م

باقة من أغاني سيد درويش، الشيخ إمام وزياد رحباني

December 22, 2006

مرثية للشيخ وريحة زمان

Posted in موزونٌ مُقـــفـّى at 10:59 pm by عمر مصطفى

الله يرحمك يا شيخ “ممدوح”، كدة يا راجل يا طيب تموت قبل ما تغني في فرحي، ده كلام؟

لا أوْحَشَ اللهُ مِنكَ يا شيخ ممدوح
لا أوْحَشَ اللهُ مِنكِ يا روح بتروح

أنا مش هاعتــب عليـــــك
عَـــدَم غُنـاك في الفـــــرح
آديـك مشــــــــــــــــــــــيت
ومجـــــاش معــاد الـفــرح
يــادي الفــرح لو جــيــــت
مين اللي صوته يفــــــوح
وَجْد وغــَـزَل..تنكيـــــــت
عشق وطرب مشـــــروح
لا أوْحَشَ اللهُ مِنكَ يا شيخ ممـــــدوح

في الفجر من رمضـــــــان
في ســـاعـــة التـسـابيـح
صوتــــك يـِرُج المــقــــام
بتلاوة وبتواشيـــــــــــــح
بنعــــــرفه على طــــــول
في آخــــــــر الأذكــــــــار
سبت الـــدُعــــا تذكــــــار
حِسّك مكانـــش خجــول
حِسـّـــك مكانش صريــح

تلـِّــجت من رعشـتــُـــه
والناس كما أنســـــــام
وانت على حضرتــُــــه
تــَـــدعو صـلاة وسـلام
وانت مِدوزن مـقــــــام
الراحــة في التراويــح
زيْ اللي ناوي يـــروح

لا أوْحَشَ اللهُ مِنكَ يا شيخ ممــــــــــدوح

روّحت سايب في بـالي لـيالي الطبطبة
وانا كنت عيـــــــل باردّد
ليه “يا نسـيم الصَـبــــا”
مـِـصــاحب الصُحبـــــة
وموّنــس الأغـــــــراب
لـــيه انت تحـديداً
بتودّنــا شجـــونك

وتتريق..
على ضلمة عـيــونــك
وروحـــــــــك الأشطر
تتـــــجلى بينهم غرام
وقلـبــــــك الأنــْـــــوَر
كَفّاك غُـنــاك يا كفيف
كَفّاك غُـنـاك يا شفيف
وف زهوة التـصقــيف
تتهز من عــُــــــــربة
تزعق كما درويــــش
ما نحســـــش الغربة
الله علــيـــك يا احمد
تسلم ايديك وتعيــــش
حبـيـت ما بينكو السهر

الفتــّـة يا ام عُمـــــر
السيكا يا أنغــــــــــام
ريحة بنفسج في صوتك
فينك يا شيخ عـُمـــــران
قد حـــــــــان آذان الفجر
وقد شـُـــفي المجـــروح


لا أوْحَشَ اللهُ مِنكَ يا شيخ ممدوح

وتنفرط من السبحة كمــــــان حبـّة
مكنتش قادر تستنى يا الزمان حبـّة
تستنى مـيـــــــــــــن
واحنا المستعجليــــن
واحنا اللي بـنـــروّح
من غير معاد واضح
من غير وداع مُرضي
بـقيـت بتــاخد روايح
ومعادش فـيك تــــدّي

أيا زمن
دعنا لنتلو ما تيــسر
من أحسن القَصَصْ
نتملــّى اكــتـــــــــر
في العيون والقِصص
دعنـــــــــــــا لنـشـدُو
في ذكرى قلبٍ شَخَص
وفــــــــــــــازَ بمـحبة
ما كنتش قادر تستنى يا الزمان حبـّة

وانت يا والــــــــــــدي
بتكتب غنوة لاصحابك
تطاوعك الـقـــــــــافية
وتفيضي يا أسامـــــي
زرعتها في قلبـــــــي
بقــْيــِت على لسانــي
“اسمه عبده..
اسمه سامي
اسمه من بين الأسـامي”
راحت ليالي زمان

خيرٌ من الأحـــــزان
ذكرى تــَعودُ الروح
لا أوْحَشَ اللهُ مِنكَ يا شيخ ممدوح

 القصيدة مسموعة

عمر 22 ديسمبر 2006

December 20, 2006

مامي ولياليه

Posted in مفيش ف الأغاني كدة ومش كدة at 1:36 am by عمر مصطفى

 

اللي بيحبوا موسيقى الراي من زمان، عارفين إنها انتشرت وأصبحت أكثر شعبية في العالم، عندما خرجت من ردائها التقليدي، واحتكت وامتزجت بموسيقات أخرى لها شعبية حول العالم

وبالنسبة لنجوم راي معروفين مثل “الشاب خالد”، و”الشاب مامي”، فالموضوع كان تجربة فنية وخياراً تجارياً في نفس الوقت؛ ماحدش بيقاوم طعم الراي السحري، خصوصاً لو كان ممزوجاً بمزيكا هو بيحبها أصلاً، وده اللي عمله “الشاب مامي” بالضبط في ألبومه الجديد “ليالي”، مع إضافة جديدة عليه

باقي مقالي عن الألبوم هنا

December 18, 2006

غنّي لكل دارس في الجامعة والمدارس

Posted in مفيش ف الأغاني كدة ومش كدة at 5:11 pm by عمر مصطفى

فرقة الطنبورة تدعوكم لاحتفالها بمناسبة مرور خمسون عاماً على عيد النصر، بغناء ريبرتوار كامل لأغاني المقاومة الخاصة بالسمسمية، وهي الأغاني التي لا تغنيها الفرقة عادةً في حفلاتها العادية. الاحتفالية ستكون في مكانين وميعادين مختلفين

الميعاد الأول: واللي يلحق ده يكون محظوظ، في بورسعيد في شارع ابو الحسن، وهيكون احتفال شعبي حي يوم 23 ديسمبر

الميعاد الثاني: وهو تكرار لنفس الاحتفال بتاع بورسعيد مع الفرق طبعاً (الأولاني مجاني والتاني بفلوس، والأولاني في الحيز الأصلي والتاني في الحيز البديل)، وده هيكون في ساقية الصاوي يوم 1 يناير 2007 ان شاء الله

أغنية الكنال

December 15, 2006

زي اللي حصل في الرواية

Posted in موزونٌ مُقـــفـّى at 12:19 pm by عمر مصطفى

أنا خايف يحصل لنا زي اللي حصل في الرواية

يعني انت مثلاً تروي الرواية

تطرح حدايا

أو انا مثلاً أحكي الحكاية

فيغمض الشباك

وهكذا

وخايف اموت قبل ما اقابله في المنتزة..

صدفة

أو في واحة الدرة الناشفة

أو في أي بلد من بلاد الله

عموماً يعني لو أنا مُت

قول له أنا فُت ملقتهوش

وقول له يبني لي بيت

ويكتب عليه: بيته اللي مسكنهوش

ويسد بابه بمراية

لإني خايف جداً

يحصل لنا زي اللي حصل في الرواية

 

بيقولك معايا اللي بان واللي

واللي لسّه

وبيقولك هربْت في قطر كان قبلي

لا بيبـــحّر ولا يرسى

وبــــيقولك انا مقدرش

ما احلمش بيك معايا

وبيقولك ما تستخسرش

تحلم معايا بيك

ولو قتلوا المراكب والصيادين

ورشوا سوق السمك نفتلين

وخبوا البحر في نقاية

ما تستسلمش..

لإنه صدقني

خايف يحصل لنا زي اللي حصل في الرواية

 

منظرة حكايات

Posted in موزونٌ مُقـــفـّى at 12:15 pm by عمر مصطفى

يا أخي الحكايات عمّالة تتمنظر بتكرارها

ولا حد بيفتكرها

ولا حد فكّرها

طب مش يمكن تكون حاجة في الهوا أو الميّا

أو ان السبب

يطلع في الحكومة الوحشة قليلة الأدب

ولا يكونش الفرق بين التوقيت الصيفي والشتوي

يمكن ما يمكنشي

يمكن ما يمكنشي

هو إيه الحكاية

دي الحكايات عمّالة تتمنظر بتكرارها

ولا حد بيفتكرها

ولا حد فكّرها

طب مش يمكن..

سميتها: صالح روحك

Posted in ع العالي..سمّعني at 1:19 am by عمر مصطفى

 

يا سلام، حزن يشبه حزن، وشجن بينده شجن، ونور أكيد شفته في يوم من الايام. “رافي شانكر” عازف السيتار الهندي الكبير، وأنشودة من أشجى وأصفى وأجمل وأرق ما سمعت في حياتي من موسيقى

صالح روحك

December 13, 2006

أن تشق لنفسك طريقاً في صحراء الحياة

Posted in تصاوير at 12:26 pm by عمر مصطفى

 

مع تحيات زنبوووء الجنينة

 

فوتوغرافيا: عمر مصطفى

سيوة نوفمبر 2005

 

Next page