January 14, 2007

المرجحة والزحلقة

Posted in موزونٌ مُقـــفـّى at 7:49 pm by عمر مصطفى

تمت كتابة هذه القصيدة باستخدام أحدث تقنيات الاستشعار عن بعد

المرجحة والزحلقة
ليهم معاني مبحلقة
فلسان وغاوي الشعلقة
وآدي النتيجة

أرابيسك ناقصه المعشقة
والذكريات متبعزقة
أنا قلت استحمل بقى
وآدي النتيجة

يا واقفة بتعدّي النجوم على الطريق الصحراوي
يا ضحكة.. ياا بنت هموم
البحر بيداوي
وانا معدّاوي على ضحكتك مقدرش غير اضحك
وانتي بتداري على دمعتك
تاخدني تنشيجة
وآدي النتيجة

البنت معرفهاش لكني باعرفها
في عنيها.. إنها عارفة
إني باعرفها
احنا اللي سابق معرفتنا قديم
أرواح بتتسابق
ونديم يطيب لنديم
يادي النعيم..
ويادي الحزن
تحويجة
وآدي النتيجة

متعبّينيش غنا في شريط
تنسيه في دواليبك
لو كان غنايا بسيط
هيلف ويجيبك
هيلف ويغازلك
وان كنت مُعتزلك
تبقي انتي واحة بعيد
تبقي انتي آخر الطريق
اللي مالوش آخر
اللي مالوش سكة
لون السما ساخر
والضحك في السكة
حاجزاه إشارة مرور
مستني لون النور

والشعر للتنويه
بيصدّر القافية
والبحر للتمويه
غطسان في تمويجة
وآدي النتيجة

 
13 يناير 2007

11 Comments »

  1. wow .. wow .. amazin .. i like it .. its wow bro .. keep it up plz

  2. Aladdin said,

    هوا دا شغل “المعدّاوية” بحق وحقيق! جميل انك خلتنا نطير للسما والنجوم ونسافر بالميكروباص ع الطريق الصحراوي ونشم ريحة الدواليب ونسمع صوت الضحكة والشرايط القديمة!

    وكويس أنك أكدت على هويتك “المعداوية” عشان انتا عارف المغرضين الـ anti-Maadists زي “لوون وولف” وشيعته!! ههه

  3. tagreba said,

    سيزر: الله يكرمك يا بيه
    لولٌ: أولاً مكانش ميكروباص دي كانت عربية ملاكي، انا اغتنيت مؤخراً، ثانياً متوقعنيش مع لوون عشان لوون حبيبي يا شرير🙂 ولتعيش المعادي حرة مستقلة وسلم لي ع المراجيح في كل مكان

  4. اياد said,

    اى

  5. amr issa said,

    (احنا اللي سابق معرفتنا قديم .)
    الجمله دي رشيقه جدا قولا وسمعا.
    والقصيدة تستحق القرايه اكتر من مره ودا اللى انا عملثو….يا معلم سلطان .
    وآدى النثيجه.

  6. tagreba said,

    إياد: لا مؤاخذة يا عمنا
    عمرو: ولله الأمر🙂

  7. سامية said,

    إيه يا عم ده!!! إيه الحلاوة دي! إيه القافية دي وإيه القفلة دي!!؟؟؟ حتة نهاية! والشعر للتنويه
    بيصدّر القافية
    والبحر للتمويه
    غطسان في تمويجة
    وآدي النتيجة
    ….
    من أجمل ما “لعبت” يا عمر! وباقول “لعبت” لإن بابا كان بيقول (اعتقد في التسجيل الإذاعي اللي عندك) ان الشعر هو انك تكتب اللي انت حاسس بيه أو اللي عايز تقوله، وأنت تلعب!وانت في القصيدة دي لعبت أحلى لعب
    :))

    ربنا يفتح عليك كمان وكمان

  8. tagreba said,

    آمين آمين🙂

  9. monbyh said,

    متعبّينيش غنا في شريط
    تنسيه في دواليبك
    لو كان غنايا بسيط
    هيلف ويجيبك
    هيلف ويغازلك
    وان كنت مُعتزلك
    تبقي انتي واحة بعيد

    اصلان تبقي بتهرج ..
    لو حتي فكرت ..

    وادي النتيجة يا عمر ..
    اروح واجي
    الاقيك عملت صورة
    فيها مرجيحة وزحاليق ..

    صورك متلونة ..

    تحياتي ..

  10. أحلى نتيجة
    !!!

    كتابتك جميلة ومعبرة

  11. maii khater said,

    تبقي انتي واحة بعيد
    تبقي انتي آخر الطريق
    اللي مالوش آخر
    اللي مالوش سكة
    لون السما ساخر
    والضحك في السكة
    حاجزاه إشارة مرور
    مستني لون النور

    الله على الكلام
    سلمت يمناك🙂


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: