February 13, 2007

سـمـاح

Posted in موزونٌ مُقـــفـّى at 1:23 am by عمر مصطفى

صحيت من النوم

مسامح الدنيا

ومسامح هدومي

ورجليّا وايديّا

وكل التراب اللي فوق الصور

مسامح غياب القمر بالشهور

وكل الشوارع اللي ضلمت عليّ

وزحمة فراقنا

ومُر السفر

سامحت اللي عاتب

وناسي يواسيني

سامحت كراريسي ومُدرّسيني

وغمضت عيني

وسامحت اضطراري

ف لحظة هبوطي

عفيت عن سكوتي

فهمت احتياجي

عفيت عن شرودي

بقهري ومزاجي

وفيّ حيل اطبطب عليّ ف وَجَل

سماح مُرتجل

وزهوة رضا

فإن حان الأجل

وحلّ القضا

سامحني يا ربّي

وفرّح حبايبي

وحنّن قلوبنا الضعيفة الحزينة

إذا ما بعدنا

فعفواً وقـُرباً

وإذا ما قَرُبنا

فبارك علينا

وقرّب مُنايا

أنا إذ أتوب

يا رب القلوب

سماحاً سماح

24 Comments »

  1. moia said,

    سامحني يا ربّي

    وفرّح حبايبي
    الله عليك يا عمر.. الله على قلبك اللى بيحس كده
    ربنا يسامحك و يكرمك 🙂

  2. Amira said,

    الله يا عمر… حمدالله على السلامة.. ربنا يارب يسامحك ويسعدك ويحقق لك كل ما تتمنى يارب وتبقى حياتك اللي جايه كلها رضا وسماح وفرح ياعمر

  3. monbyh said,

    وسامحت اضطراري

    ف لحظة هبوطي

    عفيت عن سكوتي

    فهمت احتياجي

    عفيت عن شرودي

    بقهري ومزاجي

    وفيّ حيل اطبطب عليّ ف وَجَل

    سماح مُرتجل

    دي لحظة بركة صافية
    نادرة …

    تحياتي يا عمر

  4. سامية said,

    الله الله الله الله الله الللهههه يا عمر! مش عارفة أقول لك غير الله! قصيدة فوق الوصف وفوق التعليق وفوق كل حاجة!! ربنا يفتح عليك كمان وكمان يا شاعر جميل وبني آدم أجمل

  5. حسام فخر said,

    أولاً يا عمر أشكرك على زيارة مدونتي وتعليقك الكريم. أنا في انتظار رايك في العمل الجديد
    ثانياً يا سيدي من حوالي يومين كده في ليلة أرق وبرد نيويوركي قارس فتحت الإيميل حوالي الساعة أربعة ونص لقيت صديقتنا العزيزة سامية بتقول يا ناس لازم تقروا القصيدة دي.
    كتبت لها فوراً وقلت ده شاعر عظيم
    القصيدة رائعة وهزتني من جوه خالص
    نسيت أقول لك القصيدة اسمها “سماح”
    برافو يا أستاذ
    يا انسان جداً
    أنا حاتابع مدونتك بدقة وباهتمام وطبعاً بحب شديد

  6. tagreba said,

    يا مويا يا مويا يا مويا.. آمين

    أميرة: يسمع منك ربنا يا شيخة

    مون بيه: انا اللي تحياتي وسلاماتي واحتراماتي يا ستي

    سامية: يعني بجد انا مش عارف اقول لك ايه ولّا اعمل معاكي ايه، أسعدك الله وأكرمك يا أميرة يا بنت الأُمرا

    حسام فخر: اهلين اهلين🙂 انا الظاهر عملت حاجة كويسة ف دنيتي عشان ربنا يكافئني بعقد الفل والياسمين ده.. تسعدني طبعاً بوجودك ومتابعتك دايماً، ويديم الود

  7. حسام فخر said,

    عمر
    النهارده قعدت فترة طويلة مع مدونتك ادعبس واروح من شعر لتصوير لموسيقى لأدب رحلات
    انت عملت حاجات كتير أوي كويسة وملهمة في دنيتك
    يعجبني حماسك حتى وان اختلفت معك في بعض التفاصيل
    ويسعدني سعيك للكمال الفني حتى وان كنت أراه مستحيلا
    عشان كده ننتظر منك الكثير والأكثر
    والجميل والأجمل
    و ده طبعا بيجيب معاه الصعب والأصعب
    بس هي شيلة لازم تتاخد على بعضها
    لك احترامي

  8. tagreba said,

    تعليقك جاي ف وقته بشكل غريب يا حسام.. انا شخصياً مختلف معايا في تفاصيل كتير، مش في شوية وخلاص.. لكن البحث نفسه فيه حياتي، وباحتاج دايماً مساعدة ونصح وونس من ناسي وحبايبي، اللي يسعدني تكون منهم يا حسام، متحرمنيش من آرائك وافكارك وتعليقاتك، إلى أن نلتقي إن شاء الله.. ودّي

  9. جميل والله يا عمر
    الواحد بينبسط جداً لما بيلاقى نفسه فى المود ده

  10. سماح ….
    والنبي حببتني ف اسمي

    وكمان سماحا سماح ….
    ده انت غلبت طلب السماح حبيبي قلت سماح حبيبي
    وسماح يااهل السماح

    ممكن كلمات زي دي تتلحن ياعمر ولا صعبة

    واهي تبقة اكس كلوسيف هدية ليا ف عيد الام
    مش انا زي مامتك الصغيرة

    جميلة قوي بجد

  11. camellia said,

    جميلة اوى الحالةدي وجميل تعبيرك عنها بالاسلوب الصافي ده شكرا ليك انك بتكتب كدة وشكرا لربنا ان في ناس بتكتب كدة
    واتمني انك تشرفنى في مدونتي
    http://inmytrain.blogspot.com

  12. Hamuksha said,

    عمر، شغلك ف الشهور الأخرانية متطور بشكل مذهل.
    أنا عن نفسي مسامحك ع القصايد القديمة.🙂

  13. tagreba said,

    الله يكرمك يا سماح، لأ هي مش سهل تتلحن، لكن بالنسبة لك ممكن نعملك طقطوقة صغيرة كدة تليق بالمقام العالي بس ممكن تخلص على عيد العمال وعليكي خير🙂

  14. tagreba said,

    خطوة عزيزة يا كاميليا هانم، الاسم ده عزيز عليّ جداً، شكراً على كلامك على وعد بالزيارة فوراً

  15. tagreba said,

    ههههههههههههههههه، ماشي الحال.. وشايل كل ده ف قلبك وساكت يا حمكشة🙂

  16. alzaher said,

    maybe the illustration of you and your personality is this poem🙂
    keep up the good work

  17. ياسي عمر
    بقالي يجيي ساعتين وشوية في عالمك الذي كنت جاهله
    ربما او لازم اوياريت نتقابل في يوم جميل
    تحت جميزة
    اوحتى في الفضا
    وحطيت رابط لموضوعك عن اسكندريلا في صفحتهم في منتدى سماعي
    http://www.sama3y.net/forum/showthread.php?p=54861#post54861
    وعاملين قسم بحاله وماله للتجارب المبشرة
    تعالى بقى اعملنا موضوع عن الجميزة
    وعيش معانا شوية
    على فكرة عندي الحان كويسة لأشعار مولانا فؤاد حداد
    من زمااان

  18. tagreba said,

    يا أحمد افندي.. انا اللي ممنون قوي بزيارتك دي😛 ويسعدني مقابلتك طبعاً في أي وقت، باقترح تحت الجميزة اللي ورا وزارة الحقانية
    🙂 اتشرفت يا ابو حميد، و ان شاء الله هاجي اعيش معاكو جداً حاضر، ويسعدني اسمع الحانك لأشعار مولانا الوالد

  19. حسام فخر said,

    يا عمر
    أنا سعيد وفخور إنك تعتبرني من ناسك وحبايبك
    نونس بعض
    ونضحك من قلبنا مع بعض
    ولو لزم الأمر نعيط على كتف بعض
    ونتثارى
    بس والنبي ياشيخ بلاش حكاية النصح دي
    محبتي

  20. tagreba said,

    ههههههه مفهوم مفهوم.. ميجراش حاجة يا سيدي، لو هو ده شرطك يعني

  21. حدوتة said,

    جميلة جميلة جميلة🙂

    ماكنتش متخيلة إن السماح حلو كده🙂

  22. zoof said,

    صحيت من النوم

    مسامح الدنيا

    ومسامح هدومي

    ورجليّا وايديّا

    وكل التراب اللي فوق الصور

    مسامح غياب القمر بالشهور

    وكل الشوارع اللي ضلمت عليّ

    يا رب القلوب

    سماحاً سماح

    الله

  23. elnahlaazeina said,

    so beautiful

  24. maii khater said,

    اعطاك الله ما تمنيت

    و زادك


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: