March 12, 2007

عصافير للربيع

Posted in موزونٌ مُقـــفـّى at 11:15 am by عمر مصطفى

تحت آذان الفجر

في شارعنا الأسفلت

كانت شجرة عجوزة

واقفة بميل مظبوط

بتفكر في الموت

 

الورق الهربان

زي نتيجة ف شهر ديسمبر

والفرع الحيران

يطلع ولا يتنــُّه

والفرع المتقاعد

مُتنامي ومُتباعد

الجذع المتكرمش

والورد المطرود

 

يمكن كانت نيّة

أو حِس اللي مقرّب

أو زهق المستغرب

من بُعد الأمنية

يمكن هي طريقة

للشجر الأسفلتي

يتدرب على موته

لما الدنيا تشتـّي

فنلاحظ لون أخضر

في ربيعنا الأسمنتي

ونقول شوف الشجرة

بتودّع وتعود..

……..

جنب الصبح الساكن

في شارعنا الأسفلت

كانت نفس الشجرة

بمواتها المكّار

عاملة مطار للعصافير

حاضنة هناجر وفروعها

في جميع الاتجاهات

 

رحلات يومية لبيتنا

ولكل بيوت حتتنا

وفي أي سطوح هتلاقي

صوت العصافير بيغنّي

محلا السفر العشوائي

محلا الطير الطيّاري

 

تقرا العصافير أفكاري

فتزقزق باستنفار

اللحن مفيهش مبالغة

السعيْ مفيهش هزار

احنا اللي بنـَعْني النيّة

وبنسبق باستغفار

احنا معاني الأغنية

واحنا قوافي الأشعار

احنا اللي فهمنا الشجرة

مالهاش غيرنا ومالناش

الشجر اللي بيتعاش

الشجر اللي مبيموتش

لكن مستنّي ربيع

فوتوغرافيا: عمر

13 Comments »

  1. عارف يا عمر من أحلى الحاجات اللى بحبها الفوتوغرافيا بتاعتك
    بس كمان القصيده دى
    حلوة ورقيقه وبسيطه … يمكن كمان محسوسه أوى

  2. tagreba said,

    ايوة يا نبيذ .. مانا باحاول الدنيا تشيل بعضها، يعني لو القصيدة غلبانة، الصورة توزن الموضوع أو العكس🙂 لكن كون الاتنين ييجي منهم فده شيء يسعدني طبعاً

  3. ههههه فكرة مش بطاله بردو😉

  4. hesterua said,

    الله الله الله

    حلوة قوى قوى يا عمر بجد

    عجبانى قوى يا عمر بجد

    تسلم ايدك يا فنان

  5. tagreba said,

    نبيذ: شفتي بقى

    أحمد: صادق يا ابو حميد🙂 الله يكرمك

  6. zoof said,

    جميل قوى
    كلامك حلو عشان مفهوش تزيين
    كله خارج زى ما هو كدة
    والرموز حلوة جدا
    تحياتى

  7. من كام يوم برضه الاتوبيس كان معدي على مكان فيه شجرة مكتوب عليها الشجرة ستسقط في اي لحظة
    يمكن تحذير عشان الناس متركنش تحتيها
    جميل انك تفكر في الشجرة
    جميل ان تحس بالعصافير

    وحلو قوى
    انك تكون عارف
    ان
    الشجر اللي بيتعاش
    هو
    الشجر اللي مبيموتش

    جميلة ياعمر قوي بجد

  8. حسام فخر said,

    القصيدة رائعة
    حلو انك تشوف الشجرة ومطار العصافير
    والرحلات اليومية لبيتكم
    واللحن اللي مافيهش مبالغة
    وحلو أوي إني ابتدي يومي بدفقة جمال قوية كده!
    الله يفتح عليك كمان وكمان
    نهارك فل

  9. tagreba said,

    زووف: تحياتي أنا ايضاً يا عزيزي

    جيرونيمو: انتي اللي جميلة يا جيرو، تسلمي

    حسام: نهارك ورد يا عمنا، يا رافع من روحي المعدنية دايماً كدة🙂

  10. الله يا عمر الله عليك!!
    القصيدة أكثر من رائعة، الصور !! أووف .. تحفة
    مطار العصافير، والورق اللي بقي زي نتيجة شهر ديسمبر، والصوورة!!

    برافو عمر🙂

  11. حسام فخر said,

    طيب يا عمر مش ناوي ترفع روحي المعدنية انت كمان؟

  12. tagreba said,

    بنت الحياة: والله زمان يا فاطمة.. شكراً جزيلاً🙂

    حسام: حقك يا كبير، لأ ناوي والنية لله

  13. EgyGirl said,

    حلوة موت


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: