August 2, 2007

الليلا دي

Posted in مفيش ف الأغاني كدة ومش كدة at 7:28 am by عمر مصطفى

عمرو مبقاش لوحده..! من 10 سنين أو أكتر لما كان عمرو بينزّل ألبوم جديد، كانت كمية ونوعية المنافسة مختلفة تماماً عن وقتنا الحالي، الساحة الغنائية كانت أهدأ وكل واحد من الكبار ضامن مساحته اللي محدش بيزعجه فيها، ومكانش بسهولة حد جديد يطلع ويقول (أنا اهو)..

 

لكن النهاردة في صيف 2007، عمرو دياب نجم التسعينات الأبرز أصبح مضطراً للدفاع عن مساحته ومكانه، بحسابات أعقد وأطول، في ظل وجود عدد هلامي من المغنيين، إن لم يكونوا قد وصلوا لربع مجده وشعبيته، فهم بالتأكيد قد اجتذبوا جزءاً لا يستهان به من جمهوره، لدرجة أن مغنياً مثل رامي صبري ظهر مرتدياً عباءة عمرو بكل بساطة وأريحية، والسوق مفتوح..

 

في (الليلا دي) وكأننا نرى عمرو مخاطباً جمهوره: “أنا عمرو بتاع زمان”، سواء بتشكيلة الأغاني التي لم يخرج فيها عن ألوانه الغنائية التي ألفناها عبر سنوات، أو حتى في البوستر الذي يظهر به مبرزاً وسامته بشكل لافت، متحدياً سنواته الخمسين التي اقترب من إكمالها، ومتحدياً أيضاً كل أولئك المغنيين الصغار الذين لا يهتمون كثيراً بقفل أزرار قمصانهم..

 

10 أغنيات بالألبوم كلهم من مقام موسيقي وحيد يسمى مقام (الكُرد)، لتشعر أن كل الأغنيات مثل ملابس مختلفة لكن من نفس القماشة، وهو ما قد يستدعي الملل أحياناً دون أن نفهم لماذا..

 

نجد أيضاً أن عمرو لا يزال يضع كلمات الأغاني في المرتبة الثالثة ربما، بعد الألحان والتوزيع، وهو أمر ليس بالجديد عليه، الأفكار والمعاني والمفردات عادية ومكررة أحياناً، رغم اختلاف الشعراء، وبكميات وافرة من مفردات مثل (حبيبي، حياتي، عنيا، روحي، قلبي)، وهو ما يدعم فكرة تخوّف عمرو من المغامرة بتجديد قد يكون صادم لجمهوره، خصوصاً في المرحلة دي لكن خللونا نأكد إن عمرو لا يزال في كامل لياقته الغنائية، صوته يعيش حالة نضج طويلة، نفس المستوى الجيد جداً من التوزيعات والتنفيذ وخللينا نقول الشياكة..

 

تقريباً الألبوم في أغانيه مقسوم بالتساوي بين الحالات الغربي والشرقي، وعندنا مثالين جيدين للشرقي من ألحان عمرو نفسه؛ هما (قالت لي قول) و(ضحكت).

 

أول ما ستلمحه في اللحنين هو إيقاع (المقسوم) الشرقي الذي نسمعه في عشرات الأغاني القديمة لعمرو، بأسلوب غناء شرقي يؤديه عمرو بامتياز.

 

الأغنيتان لا تميزهما الألحان فقط، بل أيضاً كلمات بهاء الدين محمد الذي أنقذ عمرو من الوقوع تماماً في فخ (العادي)، بكلمات بها حدوتة ودراما وفكرة جديدة الملحن الموهوب محمد يحيى اشترك بأربع أغنيات، ثلاثة منهم يتنافسوا في رأيي للحصول على لقب أفضل ألحان الألبوم، أولهم لحن (حكايات) الذي وزعه الموزع الاكتشاف حسن الشافعي بروح الـ Bossa Nova وهي إحدى مدارس موسيقى الـ Jazz العتيدة، ورصّعه يحيى بـ (حِلية) تسمى (كروماتيك) نسمعها مثلاً في كلمة (ليك): (مقلتهاش غير ليك)، والتي أضافت كثيراً للحن..

 

في لحن (خلليك معايا) أبرز يحيى بشطارة روح الكلمات، بنفس حالة النداء والمناجاة تلك، الذائبة في الشجن، لحن حلو قوي..

 

أما غنوة (روحي مرتاحالك) فهي السهل الممتنع، بلحن شديد البساطة ولكنه قادر على احتلال أذناك لفترة أما (عمرو مصطفى)، فلم يتميز من ألحانه الثلاث في الألبوم غير أغنية الهيد (الليلا دي) بإيقاع التانجو الهاديء الرومانسي، المتناسب مع الكلمات الهيمانة (الليلادي سيبني اقول واحب فيك.. وانسى كل الدنيا دي وغمّض عنيك)، لنستمع سوياً إلى الأغنية الرسمية للرقصة السلو في أفراح صيف 2007، على غرار أغنيات المواسم السابقة مثل (وماله)، (وحشتيني)..

 

نفس الجو ونفس الرقصة الجميلة في الحقيقة، رغم عدم خلوها من قصد تجاري..

 

ألبوم جيد في مجمله يمنح عمرو عبوراً واثقاً لهذا الصيف، رغم أنه يفتقد لبعض التجديد والجرأة في الكلمات والألحان وعدم الاعتماد فقط على (المتجرّب والمضمون)، جرأة كنا نتمنى أن تكون حتى بنصف جرأة بوستر الألبوم..

هذا المقال لصالح مزيكا دوت كوم

نسخة بالإنجليزية (ترجمة نور)

22 Comments »

  1. أنا باسمع عمرو وأنا عندي 8 سنين ولحد انهاردة، كل ما ينزل شريط جديد ألاقي نفسي باروح أسمع القديم حبيبي، ياعمرنا ، أيامنا. ويمكن ده تفسير لجزء من كلامك عن النمطية وضياع مستوي الكلمات باستثناء الأغنية اللي بتحكي موقف وحدوتة مش مجرد حالة من الهيام والسلطنة المتكررة بشكل ممل.
    يعني أغنيات زي “يدق الباب” لطيفة أوي، وأغنية زي “قالتلي قول” باردو جميلة لأنها بتحكي حاجة متميزة مش كلام تايه كده زي انت حبيبي وروحي وكل دنيتي وأملي اللي بعيش بيه وليه..الخ

    أكتر أغنية تثبت أن أداء عمرو متميز فعلا بس بيضيع في الكلمات العادية والمكررة أو اللحن التعبان هي أغنية “نقول إيه”. في الأغنية دي عمرو بيأدي بصوته وبس، الموسيقي اللي ورا مجرد خبط وضرب منتظم مفيش له أي معني. عمرو بيعمل التنغيم كله بصوته، يرتفع وينخفض وكأن أصلا مفيش موسيقي موجودة.

  2. prom said,

    شكرا لك على هذا العرض الممتاز.
    شوقتني لسماع هذا الالبوم
    تحياتي.

  3. m said,

    الطبيعى بقى انك تسمع شريط لاى حد ” ما عادا منير” فتنقى منه اغنيه او اتنين و الباقى كله ركش زى ما بيقولوا

    معجنيش شريط عمر و فعلا قديمه احسن بكتير

    اجمل اغنيه هى ضحكت
    و اجمبل ما فيها نطقه الغريب لكلمه ضحكت فى ” شفت اهى ضحكت تانى”
    🙂

  4. محمود عزت said,

    زي ما قلت لك بالظبط !
    أنا كان نفسي أوي أفهم مزيكا …:))
    إستمتعت جدا لما أقرا كلامك و أسمع الأغاني اللي إتكلمت عنها
    تشكر يا جميل

  5. arabesque said,

    أنا كمان عجبتني حكايات وشايفاها أحلى لحن في الألبوم …لكن ماحسيتش إنه قدم حاجة جديدة بألبومه الجديد
    بالنسبة للكلمات زي ما قلت مافيش تجديد خالص إلا في رومانسية كلمات الليلا دي و كلمات قالت لي قول
    كمان مدخل أغنية الليلادي شبه مدخل الأغنية المشهورة
    Sway

  6. tagreba said,

    شكراً ع المشاركة والتشجيع🙂 الواحد بيحس انه بيعمل حاجة بجد

  7. santakarim said,

    حلو تحليلك الموضوعى ده يا عمر ، أنا مبطيقش عمرو دياب ، لا قديم ولا جديد ، بس أنا كنت عايز أسمع رأيك فى مسألة الألحان المنقولة اللى أشتهر بيها وأخرها “الليلة دى”؟

  8. tagreba said,

    والله يا كيمو بيه انا باسمع كتير عن قصة الألحان المنقولة دي، أنا أصلاً مش مستمع مخلص للموسيقى التجارية ومش باكتب المقالات اللي من النوع ده إلا بالطلب وعلى سبيل الشغل، فمش مركز في قصة المنقول والأصلي كفاية، لكن حتى هم لو منقلوش بالمسطرة، فبعضهم بيسرق تيمات وأفكار من تركيا وإيران وغيرهم، ومش دايماً تقدر تكتشف ده، وده عموماً لإنه ميخفاش على حضرتك ان احنا في زمن فقير وردئ، ولعله آخر زمن

  9. Reem said,

    ألبوم عمرو حلو جدا و حسيته مناسب للصيف و الفرفشة بس مش زي أغانيه القديمة طبعا بس كسر الدنيا و طبعا ده مش جديد على الكينج المصري العالمي عمرو دياب ……………………… بس كمان الألبوم لما نزل مسح كل الألبومات لكل المغنيين
    ريييييييييييييييييييمlovely Girl-roro

  10. Reem said,

    و أكتر أغنية عجبنني ضحكت و اليلادي بجد فيهم إحساس جامد و كلمات جامدة على الآخر و أنا حسيتهم وعيشتهم ……………….. Lovely Girl-roro

  11. Aladdin said,

    أنا مع كريم تماماً! الفكرة إن عمرو دياب مبسوط أوي من فكرة أن أصبح مطرب “مصايف” بعد ما تقلصت فكرة مطربي الأفراح “الهاي”! أو قل أصبحت موضة (مش جايبة همها)! لست أرى قيمة “جمالية” حقيقية في غناء عمرو دياب، لكن قل ما شئت في قيمة ما يقدمه من منظور “غير جمالي” – يعني مثلا ملائمة صوته والتوزيع والألحان لأنك تشغل شريطه في عربية في مدينة شديدة الإزدحام مثل القاهرة، تحط أغنيته على رنة موبايل، تشغله في كاسيت محمول على أحد البلاجات كنوع من “الروشنة” وصيد السمك … قصدي المزز، الخ. شوفت بقى عمرو دياب وشرايطه مفيدة أد ايه للجماهير المصرية العريضة!!

  12. تحليلك أعجبني في كثير منه ..

    ويا صاحبي مين دلوقتي المطرب اللي بيحط الكمات رقم واحد قصاد عينيه!!

    ولكن مع كده أنا أفضل كلمات أغاني عمرو دياب بوجه عام على كلمات غيره، طبعاً لأن درء المفسدة مقدم على جلب المصلحة !!!! (مع احترامي لجميع أصناف الفاكهة)

    تقليدية الكلمات … أنا أعتبرها كتقليدية المقامات .. فخ يسعى الجميع جاهداً الفرار منه (((دون جدوى)))

    مررت للتحية والإشادة

  13. (هامش لابد منه) لأنه مفيش “أسباب” كتيرة و”وجيهة” للـ”فرح” اليومين دول، فيا ريت يا عمر بيك تنزل بالاعلانات والحبشتكنات والسلطات واللزي منه عشان إنتا عارف الواحد اد ايه “جعان” … لكل الأسباب الوجيهة – أو حتى غير الوجيهة – للفرح و… الزفة (وعقبال ليييلتك)!!

  14. بصراحة أنا كنت ناطر ألبوم عمرو دياب على أحرمن الجمر
    حتى اني ما بسمع عربي غيرو …….بس للأسف بالنسبة إلي كان مخيب لامل
    بصراحة الكلام مكرر ومستهلك لدرجة كبييرة ونزعا عا الاخير بالكلب

    لانو نسخة عن أغاني__-_نانسي عجرم_-__لاسف طبعا
    اللحن مكرر جدا مجرد فرقعة ابقاعات بدون اي حركة او تجديد الا ماندر متل اي مطرب عادي

    فهومن ألبوم وماله كان عندو اغناي دون المستوىمتل- الله لا يحرمني منك -وماله- معاك بجد
    بالمقابل كان عندو أغاني بتنافس نجوم الروك العالميين- أيوه أنا عارف- قدام عيونك -أغيب أغيب
    طبعا أنا توقعت يطور ويدخل شي من الروك بس للاسف هدا أسواالبوم بعكس البوستر
    اللي بعتقد أنو الافضل في تاريخ الاغنية العربية
    أبمينلكو

  15. shadi said,

    انا من المحبين جدا لعمــــرو دياب والبومو الجديد كان فوق توقعاتي
    اجمل اغنيتين هم الليلا دي في مقطع ..قالو ياما من القمر عيون بعيد والملايكه مستحيل تلمسها ايد..
    كمان اغنية قلتلــــي قــــول
    لإنها ظهرت بلوك جديد وغريب وفوق العادي
    تنسوش باقي الاغاني
    There are no command

  16. لؤي said,

    البوم رائع
    يعني عمرو صرلو شي البومين مش كويسين كتير
    بس هادا الالبوم رائع وفيه كتير زي الاغاني القديم ةالرائعة ……..
    وممكن هادا الالبوم من اجمل الالبومات اللي سمعتها للملك …………….

    وطبعا اي غنية لعمرو اكوس من كلمات اغاني تامر
    قال وقفتي طططنططي

    عيب ده الكلام

    لؤي من سورية

  17. نور على said,

    صراحة يا جماعة انا ما سمعت من البوم عمرو الجديد سوى اغنية الليلادى وده لانى ما عندى وقت اعمل داونلود لاغانيه
    الجديدة
    بس صراحة انا سمعت الاغنية بالبداية عجبتنى يومين وحسيتها مملة ومكررة

    ودى مجرد وجهة نظر

    شكرا

  18. رضا عم اللي هنا كلهم said,

    انتو اللي أغبية حد يعلق علي البوم لعمرو دياب بعد يوم او حتي اسبوع من نزوله
    مش تستنوا لحد ما أحساسكوا الواطي يقدر يحس الموسيقي والاغاني يا جهله

  19. عابر سبيل said,

    الصراحه انا مش عارف ايه اللى جابنى هنا للمكان ده
    بس اللى اقدر اقوله انى لقيت غم كتير وجديان اكتر
    وبهايم اكتر واكتر
    وواحد عامل ابو العريف وكاتب مقاله طويله عريضه على عمع وعم اعمامه
    ابقى افم موسيقى صح الاول وتعالى اتكللم مش حافظلك كلمتين وجاى تنطط
    ويا ترى الشب بيسمع ايه حاجه من اتني يا قديم وعامل فيها ابو طربوش
    ونظام الراقدون تحت التراب
    يا ما تامر حسنى والكلام الهايف اللى بيقوله الحبسجى ده
    بس كان فيه مقالات بتقول ان فيه ناس لسه بتفهم
    واهو اخد الميوزك اوورد تالت مرره
    ورينا بقا هتقول ايه وهتنغص حياتنا بايه منت لازم تتحجج فيها

    ملحوظه:
    دى راى الخاااااااااااص

  20. كركوبة said,

    انا مش هقول جديد
    فعلا عمرو بيكرر نفسه
    وفعلا انا لما بحب اسمع ل عمرو بشغل البوم “حبيبي”
    وفعلا منير الوحيد اللى اغانيه ف الالبوم مبتبقاش شوية ركش على رأى “مختار العزيزى”
    بس فعلا انت أبدعت ف مقالتك يا عمر

  21. أحمد محمود said,

    على فكرة يا جماعة ده اجمد البوم لعمرو دياب
    وعجبتني الحتة بتاعت الراجل اللي كتب المقال ده اللي بيقول ان مفيش جديد
    ازاي اغنية نقول ايه هي اول اغنية عربية تتعمل هاوس
    واغنية الليلادي اول اغنية عربية تتعمل تانجو
    وكلام الأغنيتين من كلمات ايمن بهجت قمر الشاعر المبدع
    وكفاية الكوبليه بتاع نقول ايه خلاص انا وانت حبيبي
    او قالو ياما ان القمر عالي وبعيد

    ولا اغنية طول م انا شايفك و قالتلي قول و ضحكت التلاتة اجمل مقسوم اتعمل في تاريخ عمرو دياب

    ولا اغنية روحي مرتحالك بجد السهل الممتنع

    والأغاني الرومانسية بجد ما يتحكيش عليها

    خليك معايا (اغنية للتاريخ)
    حكايات (اسطورة)
    وفهمت عينيك يا لهوي الله عليها
    ابداع ما بعدو ابداع

    عايزني ااقولك ايه تاني
    والله حرام عليك اللي انت بتقولوا ده

    عمرو دياب هو ملك الأغنية العربية

    خد الحكمة دي مني

    عمرو دياب مطرب في كل اغنية

  22. أحمد محمود:
    الليلادي أول أغنية عربية تتعمل تانجو؟
    هناك أغاني عربية تانجو منذ أيام محمد عبد الوهاب!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: