August 16, 2007

بخصوص الفرح :-)

Posted in حياتي at 3:34 pm by عمر مصطفى

 

 

طيب، بعد صباح الفل.. ولمن لم يعلم بعد، أخيراً صدر ديواني “أسباب وجيهة للفرح” عن دار ملامح للنشر. وهيكون في منافذ البيع اللي هابلغكم بيها لاحقاً بعد أيام قليلة ان شاء الله، ومتاح مؤقتاً دلوقتي في مقر الدار للي مستعجل وللا حاجة🙂

 

عايز اشكر ناس كتير قوي، مدين لهم بشجاعتي على اتخاذ القرار ده (اللي باشوفه لحد دلوقتي جرئ)، وكل الناس اللي أضافت للكتاب بملاحظات وقراية ونصايح ودعم نفسي ومادي، غير كل الناس اللي ألهمتني حياتي دي اللي طلع منها الأشعار وغير الأشعار، وزي ما كتبت في الإهداء “إلى كل من ملا الكاسات وسقاني”.. مديون لكم طول العمر

 

خللوني بس اشكر هنا بشكل خاص عماد ماهر (شباك) على تطوعه بتصميم الغلاف البديع ده، ولشباب دار ملامح “محمد الشرقاوي” و”عمر مصطفى” (سيزر)، و”نايرة الشيخ”، اللي بجد اتعذبوا وتعبوا وصرفوا علشان يطلعوا كتب تليق بالكتابة والقراء، وتخلليني في حالة الرضا والسبهللة دي..

 

وعايز أدّي مليون وردة للناس الجميلة عيلة جاهين وحداد، اللي ودّهم وكرمهم وذوقهم مغرقني من قبل حتى ما اعرفهم شخصياً، وأخص بالذكر بهاء جاهين اللي تكرم مشكوراً وكتب تقديم للديوان وأمين حداد اللي لولاه كان زمان الديوان ده خاسس النص تقريباً، وطبعاً سامية جاهين، جواز دخولي للصحبة الندية دي

 

مفيش مجال هنا لحصر أصحاب الفضل، عشان هم فعلاً كتير، وهاكون سعيد لو ديواني لقى من وقتكم واهتمامكم عشان تقروه وتقولولي انطباعاتكم وملاحظاتكم اللي أكيد هتضيفلي كتير

 

دمتم طيبين، مانحيّ أسباباً وجيهة للفرح

 

عنوان دار ملامح: 2 شارع الديوان – جاردن سيتي (قصاد أبو شقرة اللي ف شارع القصر العيني) – تليفون:0112771522

يباع الكتاب هنا

اقروا كمان مقدمة الديوان بقلم بهاء جاهين

36 Comments »

  1. مبدئيا كده : معرفتك يا عمر , سبب وجيه للفرح
    و أشعارك و الصور و المزيكا – اللي هنا – أسباب وجيهة برضه للفرح
    أكيد الديوان هايكون فيه أسباب أخري
    هاجيب الديوان و اقراه ,و راجع هنا تاني
    مش هاتأخر

  2. الف مبروك يا عمر
    حاجيب الديوان إنشاء الله ولينا كلام تانى بعده
    عقبال التانى و التالت و العاشر إنشاء الله

  3. maii khater said,

    عمر
    بجد انا فرحت جداااااااااااااا
    مش فرحت ليك قد ما فرحت ان الحجات اللى حبيتها عندك هتكون مكتوبه فعلا فى كتاب و كده ” حب ذات بقى معلش”
    المقدمه اللى اتكتبت عليك جميله
    و الاجمل اختياره لى لا تشبكينى و النبى
    دى احب حاجه ليا
    بجد الف مبروووووووووووووووووووووووك
    انت حد تستاهل كل شىء جميل
    اكيد هنقراه كلنا و هنهريك اراء
    مبروك يا بطل
    :))

  4. hesterua said,

    سبب وجيه للفرح ان الواحد يعرف حد قلبه ابيض زيك يا عم عمر يا شاعر
    وسبب وجيه للفرح ان الواحد يفرح بأول خطوة دى

    الف مبروووووووووووووك يا عمر يا جميل وعقبال كل خطوة حلوة فى حياتك

    صاحبك اللى فرحاااااان قوى احمد شلبى

  5. taghreed said,

    ألف ألف مبروووووووووووووك .أنت فعلا كما عمرو عزت انسان معرفته سبب وجيه للفرح
    حقا انا سعيدة للغاية بمعرفتك وكمان بالتعرف علي اشعارك وصوتك الملئ بالأحاسيس واشياء كثيرة نفتقدها في عالم اليوم
    الف مبروك وعقبال الف ديوان وديوان ومقدمة الديوان رائعة والمزيج اللي بأشعارك بديع
    وأوعدك أنا هشتريه وأقولك رأيي اذا كان مهم بالنسبة لك
    ابعت لي ايميلك علشان اراسلك مباشرة لو حبيت.
    تحياتي

  6. taghreed said,

    عندي سؤال ليه مش حاطط موقع الجميزة ؟؟؟!!!!!!

  7. taghreed said,

    ؟

  8. مبروك يا عمر
    يا فنان🙂
    هجيب الديوان وانتظر مني النقد

  9. محمد الشرقاوى said,

    هو بس أنا اللى عاوز أشكرك وأشكر بجد كل حد وقف معانا فى البداية…
    وانت أولهم وناجى ومينا ..
    تحياتى ولعادل سلامه جزيل الشكر انه خلانى اكلمك واقولك إزيك..
    تمنياتى بدواوين قادمة وبطبعات متتالية بحجم موهبتك وتميزك..

  10. tagreba said,

    عمرو: أنا ف انتظارك🙂

    ماشي الطريق: تمام يا فندم

    مي: الله يبارك فيكي.. تسلمي يا رب

  11. tagreba said,

    أحمد: يخلليك ليّ يا بو حميد، وعقبالك قريب بقى

    تغريد: سعيد بمعرفتك واهتمامك.. ايميلي tagreba@gmail.com، منتظر رأيك وانطباعاتك

    محمد بيه مفيد: انقد يا سيدي انقد، بس بالراحة علينا احنا غلابة🙂

  12. tagreba said,

    محمد الشرقاوي: على راسي يا بطل، من نجاح لنجاح يا محمد

  13. wafaa said,

    مبرووك🙂

  14. جميل جدا الكلام اللي كتبه الشاعر الجميل “بهاء جاهين” في حقك وحق ديوانك يا عمّور!! كنت أتمنى لو طالت المقدمة لكن عذره أنه يريدنا في النهاية أن نقرأ الديوان ونستتمتع به.

    يا ريت بقى زي ما قلت عند ربيع تشتغل على ندوة بهذه المناسبة وحلاوتها في حموتها!!

  15. tagreba said,

    وفاء: الله يبارك فيكي

    لول: الله كريم، هنحاول في اقرب وقت

  16. taghreed said,

    فكرة حلوة حكاية الندوة دي
    وممكن أقترح على الناس يبقى يوم في رمضانففي المركز لو حبيت
    أمسية شعرية
    ايه رأيك؟
    أنا هشتري الديوان النهاردة
    يلا سلام ياعزيزي
    أشوفك بقى لما اقراه واقولك انطباعي

  17. alzaher said,

    مبروك يا عمر
    مستني نسختي إن شاء الله يا أستاذ🙂

  18. alzaher said,

    مبروك يا عمر
    مستني نسختي إن شاء الله 🙂

  19. جيرو said,

    وانا اللى افتكرتك

    هتكتب تشكرني
    وتقول قد ايه شجعتك

    وكانت عباراتي الحماسية لها دور فعال في انجازك العظيم ده

    عموما انا فرحانة جدا
    وحاسة انه اي انجاز بيعمله حد مننا

    انجاز لجيل بحاله

    اتولد في دنيا صعبة
    واحلامه عنه بعيدة

    يارب دايما ياعمر تملك اسباب وجيهة للفرح

  20. tagreba said,

    جيروو: انتي اكيد بتنكشيني مش كده؟🙂 عموماً انتي عارفة يا جيرو، وللا اقول؟؟ يومك جميل

  21. taghreed said,

    ممكن اتحشر بنكم
    لاء قول أنا عاوزه أسمع

  22. مجهول said,

    ممكن أسأل
    انا مش أعرفك بس عندي لبس ما وعاوزه اسأل هل أنت عمر مصطفي الملحن؟؟؟؟؟

  23. mon-byh said,

    مســا الخير ..

    تحياتي يا شاعر ..
    حواديتك متصورة..
    غناوي متدندنة..
    مبروك يا عمــــــــر..

  24. tagreba said,

    مجهول: لو تقصد عمرو مصطفى بتاع مين حبيب بابا، فمش أنا
    موون: تسلمي يا ستي، الله يبارك فيكي

  25. مجهول said,

    أمال أنت بتاع ايه؟

  26. nousha said,

    alf mabrouk !

  27. حسام فخر said,

    يا عمر
    أنا فرحان بيك وبديوانك وبمقابلتك مرتين بسرعة في القاهرة…
    أشكر الدنيا الجميلة اللي عرفتني بانسان بديع زيك..
    فعلاً هناك “أسباب وجيهة للفرح”..
    شكري ومودتي
    حسام

  28. typhon said,

    mabrook

  29. tagreba said,

    نوشة: الله يبارك فيكي🙂

    حسام: في قلبي وعلى راسي من فووووق.. يدوم الود والمحبة

    تيفون: الله يبارك فيك

  30. د. ضياء النجار said,

    ألف مبروك يا استاذ عمر على الديوان اللي أنا متشوق بالفعل على قراءته، على العموم لما أنزل مصر أبقى اشتريه.

    ألف مبزوك مرة تانية وإلى مزيد من الشعر يجعلنا نؤمن أنه هناك فعلا أسباب وجيهة للفرح وللفرج.

    تحياتي

    ضياء

  31. دندنة said,

    الكتاب فى شنتطى…بقرأه فى كل وقت تقريبا…
    لانى بعيد قرايته كل مرة….لانى بكتشف حاجات كتير بحبها فيه

    حاسة بلذة وانا بقرأ

    هاقولك رايى تفصيلا لما اخلص…دا لو خلصت

    بس اعتبرنى بسقفلك اعجابا

  32. مش عارفه لسه بتبص ع التدوينه دى والتعليقات هنا
    ولا الناس خلاص هنت وباركت وكله بيتك بيتك والحفلة خلصت! أنا للأسف اشتريت الديوان من يومين بس
    المهم بخصوص الفرح
    الديوان جميل وخلق هنا حالة م البهججه غير طبيعية
    بدءاً من الغلاف المط الأسود الأشبه بسبورة فصلنا أيام ابتدائى لما كان الواحد بيحب يرسم ويشخبط بالطباشير الطبى الملون -اللى كان أيامها عملة نادرة.. ومروراً بحجم الكتاب الصغنتوت اللى جه متماشى مع المرحلة العمرية دى اللى أنت وصفتها وصفاً بديعاً على حته م السبورة- قصدى الغلاف بس من جوه…”عندما كان الفرح مجانياً وبلا تحفظات وعندما كان الحزن بسيطاً وبلا أسى”.. حلو أوى القرار والعهد اللى أخدته على نفسك بإن “للفرح الأولوية طالما كانت الأسئلة إجبارية والامتحان مفاجئ”..وعندما فتحت الديوان عجبنى الورق الذى بدى وكأنه أصفر بفعل الأيام وذلك بالرغم من إن الكتاب صدر 2007
    وده خلانى أحس إنى ماتأخرتش أوى..قريت الديوان كله ف قعدتين بالظبط..وقعدت أتنى الصفحات اللى احتوت على أفضل القصايد- من وجهة نظرى يعنى.. صحيح الديوان بقى “دوج-إييرد” -وده تعبير باللغة الإنجليزية لوصف صفحات كتاب بيتنى طروفها القارئ بغباء- بس أعمل ايه بقى عشان أفتكر لما أكتب تعليق
    القصايد اللى عجبتنى أوى
    اتجاه عكسى
    عيّل
    حاسس بإيه
    المدينة الصبح بدرى
    النهر فى حالته البحرية
    سماح

    شكراً على توضيح الأسباب الوجيهة للفرح.. فعلاً ساعات الواحد مابيشوفش الحاجات الحلوة القريبة أوى منه.. طول نظر ده ولا ايه؟ مع إنى عندى قصر مش طول = )

  33. ad sabry said,

    this 1st time for me in ur blog, its
    really nice blog
    u have fine style of writing
    i didnt read the dewan yet
    but promise to do

  34. مبروك يا عمر أسبابك الوجيهة للفرح
    قرأت الديوان وأعجبني
    ألف مبروك

  35. janjaah said,

    أنا مش عارفة أنت لسه بتستخدم المدونة و بتفتحها ولا لأ، أنا قريت قصيدة قبل المراكب ما تتحول بيوت على تمبلر من سنة و نص، و من ساعتها شبة حافظة القيدة و بدرو على الديوان بأيديا و سناني في كل حتة، لفيت عليه معرض الكتاب سنتين ورا بعض و مش لاقياه، قولت أدور عليه بي دي اف حتة و هطبعه لنفسي و مش لاقياه، ممكن الله يخليك تقولي ألاقيه فين؟ أو أشتري منك نسخة أن شالله مطبوعة من برينتر و معمولة بوكليت؟ بأي تمن. يا ريت لو شفت الكومينت مطنش، شكرا على أي حال.🙂

    • tagreba said,

      مساء الخير، انا شفت تعليقك حالا بالصدفة، من فضلك ابعتلي او ابعتيلي ع الميل ده علشان ننسق ازاي اوصل لك نسخة، وشكرا على ذوقك واهتمامك tagreba@gmail.com


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: