December 3, 2005
أول الفراشات
امبارح بعد بروفة جميزة، سهرت مع العم ناصر النوبي كبير الجميزة، و“ميدو” الصوت اللي بيعجبني جداً شخصياً، ناصر استفزني كالعادة، وخللاني لحنت جزء من أغنية جديدة من قصيدة “كلام فاضي”، اللي هو بيقول: ط
خللينا نستفسر
عن أول الفراشات
عن أروق الينابيع
خللينا لما نبيع
مننتهيش فجأة
خللينا في الزنقة
نغازل الوسعات
وافتكري ليه في الفرْح
ابدعتي في البسمات
وافتكري ليه فعلا
قدرتي ترضيني
وانا كنت مش راضي
النتيجة كانت لطيفة، خصوصاً بعد تعليقات وملاحظات ناصر اللي كان بيشد في شعره بسبب عندي معاه فيها، وخللته يطلع كتاب الأبراج عشان يعرف يتعامل معايا ازاي !!!! وميدو كان أداؤه تحفة، ياريت الواحد كل ما يلحن حاجة، يلاقي صوت جميل زيه يسمعه شغله بجد..عموماً حابب اعرف رأيكم دام فضلكم
إهداء للعزيزة “جيرونيمو”
تَجرِبـــــــــة An Expriement 
wa7ed mn masr said,
December 4, 2005 at 2:25 am
عمر أنا ماكنتش قريت القصيدة ..هايــــــــــــلة من أجمل الحاجات اللى قريتهالك…اللحن كمان وصل إحساس الكلام، كملها من غير كروتة…عبقرية
Ghada said,
December 4, 2005 at 2:59 am
ماذا أقول بعد كل ما قيل..
شكلكم كنتم في حالة “دوزنة” عالية قوي يا عمر..
(مش هي اسمها كده برضه)
جميلة فعلا.. و”ميدو” حاسس الكلام بشكل مثير للحسد والحقد والغل و.. كفاية كده!
هاقول لك زي ما باقول لك دايما..
روح ربنا ما يضيق لك وسعات يابني
:))
Omar said,
December 4, 2005 at 3:18 am
واحد من مصر: ربنا يكفينا شر الكروتة، ربنا يخلليك
أحمد: انا اللي شكراً قوي
غادة: تسلمي يا “غادة”، اسمك لوحده مديح، خصوصاً لما يبقى اسم على مسمى، ويسمع من بقك ربنا
hesterua said,
December 4, 2005 at 11:02 am
الله
الكلام و اللحن روعة يا عمر
والصوت جميل جدا وواصل قوى
خجل said,
December 5, 2005 at 7:54 am
خير ..خير
Doaa Samir said,
December 5, 2005 at 9:27 am
هايلة،،إنت عارف رأيي يا عمر
بس ياريت لو تكملوها كلها،
وباخبي..
وانا عريان
وجعي عن الأحزان
وباداري وانا دفيان
فرحي البسيط بيكي
غجرية في عنيكي
بترقص اسباني
وبتنشر المناديل
يكفي العياط بالليل
زارعين سُكات أشطر.. إلخ
وياسلااااام لو أبدعتوا في جملة “زراعين سكات أشطر”.. بديعة أوي، ومؤلمة أوي، وحقيقية أوي “زارعين سكات”.. أصل فكرة السكوت والصمت عمالة تصرخ جوايا مع إنها ساكتة… إحم.. عجبي
Geronimo said,
December 5, 2005 at 11:56 am
خليني
اخرج م السكات
وانطق بكا
وذكريات
خليني استفسر
عن قوة ف كلامك
ف اللحن والنغمات
ف الروح وإحساسها
خليني اتساءل …
خليني لما ابيع
واكون خلاص بضيع
ابتدي تاني
وارجع لأحلامي
واعيش براح اكبر
وارقص لأحزاني
واطلعلها لساني
خليني اشكرك ولو اني مش هقدر اشكرك
فعلا قدرت ترضيني وانا كنت مش راضية
مزيكتك تجنن
وميدو صوته دافي قوى مع ان الليلةدي برد
والكلمات عاملة زي البوسة السخنة قوى او رغيف العيش الطازة
مش لاقية لها اي وصف غير كده
مش هشكرك
اصله واجب عليك
مش احنا صحاب صحاب
بكرة هتعرف انت اديت لي ايه ؟؟؟!!
أصله هيبان عليا
سامية said,
December 6, 2005 at 4:09 am
جميلة وبسيطة وواضح انه بيقولها وهو حاسس بالكلام جدا
Omar said,
December 6, 2005 at 4:50 am
دعاء: مش معنى اننا بنسكت انه مش قادرين نتكلم، ونصرخ كمان، قوللي اللي ف نفسك، ولا يهمك
خجل: ماشي الحال 🙂
جيرونيمو: اهو ده بقى رد السلام بأحسن منه، انتي تستاهلي كل خير، خلليكي كويسة على طول، واصحاب على طول طبعاً
سامية: شكراً للدعم الجميل الدائم ده يا ست الكل، كويس انها عجبتك، هاكملها وتقوليلي رأيك بقى
سامية said,
December 7, 2005 at 9:51 am
كملها وسمعهالنا في حفلة
🙂
Omar said,
December 7, 2005 at 12:39 pm
إن شاء الله، دبستي نفسك كدة، لو مجيتيش مش هنقولها :-)–>